تیری آواز میں، تیری ہی ہنسی، ہنستی ہے — سعید شارق
شاعر
تیری آواز میں، تیری ہی ہنسی، ہنستی ہے
تیری آواز میں، تیری ہی ہنسی، ہنستی ہے
میری موجودگی پر تیری کمی ہنستی ہے
"کیوں، میاں! کیا ہُوا؟ دروازہ کُھلا؟ ہا ہا ہا"
طعنے دیتے ہیں مکان اور گلی ہنستی ہے
چشمِ پُر خاک بھی اب ہونٹوں کی دیکھا دیکھی
(گریہ بنتا ہے مگر) مجھ پہ یونہی ہنستی ہے
کیا کروں! کس کے گلے لگ کے مَیں دھاڑیں ماروں؟
ایک تنہائی تھی سو دُور کھڑی ہنستی ہے
جیسے کہتی ہو، بھلا تجھ کو ضرورت کیسی؟
وقت دیکھوں تو یہ لگتا ہے گھڑی ہنستی ہے
جب سے تُو آیا ہے چُپ چُپ سی ہے کیوں ویرانی ؟
کیا ہُوا ہے اِسے؟ ویسے تو بڑی ہنستی ہے!
نیند پھرتی ہے مرے ساتھ مرے کمرے میں
اور بے خوابی سرہانے سے لگی ہنستی ہے
قہقہے ہیں مرے سینے میں کہیں آنسو ہیں
تیری تصویر کبھی روتی کبھی ہنستی ہے
بھپتیاں کستی ہے مجھ پر کبھی خود پر،شارق
ناؤ کا ذکر بھی چھیڑوں تو ندی ہنستی ہے
Teri awaz mein, teri hi hansi, hansti hai
Teri awaz mein, teri hi hansi, hansti hai
Meri maujoodgi par teri kami hansti hai
"Kyun, miyan! Kya hua? Darwaza khula? Ha ha ha"
Taane dete hain makan aur gali hansti hai
Chashm-e-pur-khaak bhi ab honton ki dekha dekhi
(Girya banta hai magar) mujh pe yunhi hansti hai
Kya karoon! Kis ke gale lag ke main dhaaden maroon?
Ek tanhai thi so door khadi hansti hai
Jaise kahti ho, bhala tujh ko zarurat kaisi?
Waqt dekhun to ye lagta hai ghadi hansti hai
Jab se tu aaya hai chup chup si hai kyun veerani?
Kya hua hai ise? Waise to badi hansti hai!
Neend phirti hai mere saath mere kamre mein
Aur be-khwabi sirhane se lagi hansti hai
Qahqahe hain mere seene mein kahin aansu hain
Teri tasveer kabhi roti kabhi hansti hai
Bhapatiyan kashti hai mujh par kabhi khud par, Shariq
Nao ka zikr bhi chhedoon to nadi hansti hai
شاعر کے بارے میں
نوجوان شاعر سعید شارق کا اصل نام محمد اجمل سعید ہے۔ وہ 03 جون 1993ء کو اسلام آباد میں پیدا ہوئے۔ انھوں نے بی ایس انجینئرنگ ٹیکنالوجی ( مکینیکل) می...
مکمل تعارف پڑھیں