کلام کر — زین شکیل

Kalaam kar

Kalaam kar ! Haseen shakhs !
Dekh ! Aasman ke kaan bhi latak gaye !
Sama'atein teri sada-e-sabz ki talaash mein bhatak rahi hain der se !
Kalaam kar ! Ae mehjabeen shakhs !
Mujh se aaj mere ghar ki khidkiyan, deewar o dar yeh keh rahe hain !
Koi ramz-e-hijr ashkaar kar nahin raha !
Chalo hazaar baar na sahi to ek baar kar nahin raha !
Kalaam tera yaar kar nahin raha !
Kalaam kar ! Ae shahar-e-qalb ke makeen shakhs !
Tu to jaanta nahin ke tu ne iztiraab ka sukoon kis qadar tabah kar diya !
Sukoot ka jo habs hai ! Isi ko be-panah kar diya !
Safed guftugu ka rang bhi siyah kar diya !
Kalaam kar ! Zaheen shakhs !
Tu ne hi kabhi mujhe kaha tha ! 'Pur yaqeen shakhs'
Dekh ! Teri chup mera yaqeen kha gayi !
Yahi to mera aasman ! Meri zameen kha gayi !
Yeh main / yeh mera sab to ek taraf !
Teri yeh chup tamaam samayeen kha gayi !
Kalaam kar ! Ae behtareenon mein behtareen shakhs !
Dekh ! Mera zabt ab hawa ki bad-zubaniyon se toot jaayega !
Koi bhi sang ab meri sada ke raaste mein aa gaya to toot jaaye !
Sama'aton ke paaon mein jo aabla hai phoot jaayega !
Yeh bad-aqeeda ! Be-imaan ! Bad-chalan hawa bhi mujh se keh rahi hai !
Ab madhur sada ki khushbooyein fiza mein gholta nahin !
Suroon ko tolta nahin !
Junoon ka bhed kholta nahin !
Sama'atein bahut udaas ho gayi hain Zain !
Tera yaar bolta nahin ?
Kalaam kar !
Ke ab tamaam bad-zubaan sadaon ko zawaal ho !
Sama'atein jo tere waaste taras gayi hain !
Un ka daur ab malaal ho !
Jo ho nahin raha hai ! 'Woh' kamaal ho !
Kalaam kar !
Ke ab tamaam be-qarariyon ki khair ho !
Tamaam saa'aton ki aah-o-zaariyon ki khair ho !
Sama'aton ki intizaariyon ki khair ho !
Teri sada ki parda-daariyon ki khair ho !