جب کبھی خوبیٔ قسمت سے تجھے دیکھتے ہیں — آواز: زین چوہدری | شاعر: پروین شاکر

جب کبھی خوبیٔ قسمت سے تجھے دیکھتے ہیں

جب کبھی خوبیٔ قسمت سے تجھے دیکھتے ہیں
آئنہ خانے کی حیرت سے تجھے دیکھتے ہیں
وہ جو پامال زمانہ ہیں مرے تخت نشیں
دیکھ تو کیسی محبت سے تجھے دیکھتے ہیں
کاسۂ دید میں بس ایک جھلک کا سکہ
ہم فقیروں کی قناعت سے تجھے دیکھتے ہیں
تیرے جانے کا خیال آتا ہے گھر سے جس دم
در و دیوار کی حسرت سے تجھے دیکھتے ہیں
تیرے کوچے میں چلے جاتے ہیں قاصد بن کر
اور اکثر اسی صورت سے تجھے دیکھتے ہیں
کہہ گئی باد صبا آج ترے کان میں کیا
پھول کس درجہ شرارت سے تجھے دیکھتے ہیں
تجھ کو کیا علم تجھے ہارنے والے کچھ لوگ
کس قدر سخت ندامت سے تجھے دیکھتے ہیں

شاعر: پروین شاکر

آواز: زین چوہدری