اے درد دل میں رہ کر دل ہی کا راز ہو جا — افقر موہانی
شاعر
اے درد دل میں رہ کر دل ہی کا راز ہو جا
اے درد دل میں رہ کر دل ہی کا راز ہو جا
بیمار غم کا اپنے خود چارہ ساز ہو جا
اے جذب دل سراپا سوز و گداز ہو جا
دنیائے رنگ و بو میں دنیائے راز ہو جا
ہاں ہاں بڑھا دے مدت پابندیٔ جنوں کی
زلف دراز جاناں عمر دراز ہو جا
ہر ذرۂ حقیقت یہ دے رہا صدا ہے
پہلے رہ طلب میں خاک مجاز ہو جا
سر نامۂ عدم ہے عنوان زندگانی
اے امتیاز ہستی تفسیر راز ہو جا
اے بے خبر گزر جا ذوق نظر کی حد سے
جلووں میں اس کے گھر کر جلوہ طراز ہو جا
اے بندۂ طریقت آداب زندگی سن
محو سجود ہو کر جان نماز ہو جا
خرقہ شراب سے تر دستار مے سے رنگیں
اے شیخ پاک دامن یوں پاکباز ہو جا
تو راز داں ہے دل کا دل راز دار الفت
یا سرفراز کر دے یا سرفراز ہو جا
تو رونق حرم ہے یا بت کدہ کی زینت
خود امتیاز بن کر اک امتیاز ہو جا
جانا ہے جب مقرر دار فنا سے افقرؔ
راہ وفا میں مٹ کر خاک حجاز ہو جا
Ay dard-e-dil mein rah kar dil hi ka raaz ho ja
Ay dard-e-dil mein rah kar dil hi ka raaz ho ja
Bimar-e-gham ka apne khud chara-saaz ho ja
Ay jazb-e-dil sarapa soz-o-gudaz ho ja
Duniya-e-rang-o-boo mein duniya-e-raaz ho ja
Haan haan badha de muddat pabandi-e-junoon ki
Zulf-e-daraz-e-jaanan umr-e-daraz ho ja
Har zarra-e-haqiqat yeh de raha sada hai
Pehle rah-e-talab mein khak-e-majaaz ho ja
Sar-nama-e-adam hai unwan-e-zindagani
Ay imtiyaz-e-hasti tafseer-e-raaz ho ja
Ay be-khabar guzar ja zauq-e-nazar ki had se
Jalwon mein us ke ghar kar jalwa-taraz ho ja
Ay banda-e-tariqat aadaab-e-zindagi sun
Mahv-e-sujood ho kar jaan-e-namaz ho ja
Khirqa sharab se tar dastaar mai se rangin
Ay shaikh-e-pak-daman yun pakbaz ho ja
Tu raaz-dan hai dil ka dil raazdar-e-ulfat
Ya sarfaraaz kar de ya sarfaraaz ho ja
Tu raunaq-e-haram hai ya but-kada ki zeenat
Khud imtiyaz ban kar ek imtiyaz ho ja
Jana hai jab muqarrar daar-e-fana se Afqar
Rah-e-wafa mein mit kar khak-e-hijaz ho ja
شاعر کے بارے میں
افقر موہانی اردو کے ممتاز شاعر تھے جن کا اصل نام سید حسین اور تخلص افقر تھا۔ بعض مستند حوالوں میں ان کا تاریخی نام ظفر وارث بھی ملتا ہے۔ وہ13 جولائ...
مکمل تعارف پڑھیں