انگوٹھی — اختر شیرانی

Angoothi

Chhupaun kyun na dil mein khatim-e-gauhar-nigar us ki
Yehi le de ke mere paas hai ik yaadgar us ki
Yeh tanhai mein mere lab tak aa kar muskurati hai
Aur apni malka ki tarah dil ko gudgudati hai
Qalam ke saath mere haath mein har waqt rehti hai
Aur us ke dast-e-rangeen ke fasanay mujh se kehti hai
Tilaii ungliyon ka jab mujhe qissa sunati hai
Tasavvur mein sitaron ke se paikar kheench laati hai
Meri Salma ko us ne shad aur nashad dekha hai
Gahe masroor gahe mail-e-faryad dekha hai
Use maloom hain achhi tarah betaabiyan us ki
Nahin posheeda us ki aankh se be khwabiyan us ki
Shab-e-tanhai mein us ne use be dar paya hai
Aur aksar dida-e-sarshar ko khoon-bar paya hai
Use maloom hai woh kis tarah maghmoom rehti thi
Kisi ke gham mein lutf-e-zeest se mehroom rehti thi
Mera khat padh ke woh kis kis naaz se masroor hoti thi
Phir apni be-basi par kis tarah ranjoor hoti thi
Yeh shahid hai ke us ki sham-e-gham kyun kar guzarti thi
Yeh shahid hai ke woh ro ro ke kyun kar subh karti thi
Woh jab dil tham leti thi hujoom-e-gham se ghabra kar
To yeh karti thi us ki gham-gusari dil ke paas aa kar
Use maloom hai jo dard tha us pak seene mein
Basi hain us ke dil ki dhadkanein us ke nageene mein
Pohunchti hain shua'ain us ki jis dam chashm-e-hairan tak
Tasavvur mujh ko le udta hai Salma ke shabistan tak
Jahan Salma ke aur mere siwa hota nahin koi
Angoothi khoi jaati hai magar khota nahin koi