کہانی کا سماں — اختر شیرانی
شاعر
کہانی کا سماں
مری پیاری انا میری انا جانی
سنا دے مجھے کوئی ایسی کہانی
کہ جس میں پرستان کا سا سماں ہو
زمیں پھول کی چاند کا آسماں ہو
ستارے برستے ہوں جس کی فضا میں
ہو خوشبو کا طوفان جس کی ہوا میں
جہاں شہد و شربت کی نہریں رواں ہوں
جہاں ہیرے یاقوت کی کشتیاں ہوں
اور ان میں کوئی گیت گاتی ہوں پریاں
شعاعوں کے بربط بجاتی ہوں پریاں
پہاڑ اس میں جتنے ہوں سارے طلائی
اور ان کے سہانے نظارے طلائی
اندھیرا نہ ہو نام کو بھی جہاں میں
ہو اک چاند روشن ہر اک شمع داں میں
محل ہو ہر اک سنگ مرمر کا جس میں
ہر اک طاق ہو لعل و گوہر کا جس میں
نہ بوڑھا ہو کوئی نہ کوئی جواں ہو
فقط میں ہوں اور میری انا وہاں ہو
مرے پر ہوں اڑتا پھروں میں ہوا میں
حکومت ہو میری وہاں کی فضا میں
غرض میری انا مری انا جانی
سنا دے مجھے کوئی ایسی کہانی
Kahani ka samaan
Meri pyari ana meri ana jaani
Suna de mujhe koi aisi kahani
Ke jis mein paristan ka sa samaan ho
Zameen phool ki chand ka asman ho
Sitare baraste hon jis ki fiza mein
Ho khushboo ka toofan jis ki hawa mein
Jahan shehd-o-sharbat ki nahrein rawaan hon
Jahan heere yaqoot ki kashtiyan hon
Aur un mein koi geet gaati hon pariyān
Shuaaon ke barbat bajati hon pariyān
Pahaad is mein jitne hon saare talai
Aur un ke suhane nazaare talai
Andhera na ho naam ko bhi jahan mein
Ho ek chand roshan har ek shama daan mein
Mahal ho har ek sang-e-marmar ka jis mein
Har ek taaq ho laal-o-gauhar ka jis mein
Na boodha ho koi na koi jawan ho
Faqat main hoon aur meri ana wahan ho
Mare par hoon udta phiroon main hawa mein
Hukumat ho meri wahan ki fiza mein
Gharaz meri ana meri ana jaani
Suna de mujhe koi aisi kahani
شاعر کے بارے میں
اختر شیرانی (اصل نام محمد دائود خان) اردو ادب کے ممتاز رومانوی شاعر تھے۔ وہ 4 مئی 1905ء کو ریاست ٹونک، برطانوی ہندوستان میں پیدا ہوئے۔ ان کا تعلق پ...
مکمل تعارف پڑھیں