بدنام ہو رہا ہوں — اختر شیرانی

Badnaam Ho Raha Hoon

Fariyadi-e-jafa-e-ayyam ho raha hoon
Pamaal-e-jaur-e-bakht-e-nakaam ho raha hoon
Sarguzasht-e-khayal-e-anjaam ho raha hoon
Basti ki ladkiyon mein badnaam ho raha hoon
Badnaam ho raha hoon
Salma se dil laga kar
Basti ki ladkiyon mein badnaam ho raha hoon
Salma se dil laga kar Salma se dil laga kar
Us hoor-wash ke gham mein duniya o deen ganwa kar
Hosh o hawaas kho kar sabr o sukoon luta kar
Baithe bithaye dil mein gham ki khalish basa kar
Har cheez ko bhula kar
Salma se dil laga kar
Basti ki ladkiyon mein badnaam ho raha hoon
Kahti hain sab yeh kis ki tadpa gayi hai soorat
Salma ki shayad is ke man bha gayi hai soorat
Aur is ke gham mein itni murjha gayi hai soorat
Murjha gayi hai soorat kumhla gayi hai soorat
Sanola gayi hai soorat
Salma se dil laga kar
Basti ki ladkiyon mein badnaam ho raha hoon
Panghat pe jab ke saari hoti hain jama aa kar
Gaagar ko apni rakh kar, ghoonghat utha utha kar
Yeh qissa chhedti hain mujh ko bata bata kar
Salma se baatein karte dekha hai us ko ja kar
Hum ne nazar bacha kar
Salma se dil laga kar
Basti ki ladkiyon mein badnaam ho raha hoon
Raaton ko geet gaane jab mil kar aati hain sab
Talaab ke kinare dhoomein machati hain sab
Jangal ki chandni mein mangal manati hain sab
Toh mere aur Salma ke geet gaati hain sab
Aur hansti jaati hain sab
Salma se dil laga kar
Basti ki ladkiyon mein badnaam ho raha hoon
Khetton se lautt-ti hain jab din chhipe makaan ko
Tab raaste mein baham woh meri daastan ko
Dohra ke chhedti hain Salma ko meri jaan ko
Aur woh haya ki maari si leti hai zubaan ko
Ke chhede is bayan ko
Salma se dil laga kar
Basti ki ladkiyon mein badnaam ho raha hoon
Kahti hai reham kha kar yoon ek mah-e-tal'at
Yeh shehri naujawan tha kis darja khoobsurat
Aankhon mein bas rahi hai ab bhi woh pehli rangat
Do din mein aah kya hai kya ho gayi hai haalat
Allah teri qudrat
Salma se dil laga kar
Basti ki ladkiyon mein badnaam ho raha hoon
Us shama-roo ka jab se parwana ban gaya hoon
Basti ki ladkiyon mein afsana ban gaya hoon
Har mah-wash ke lab ka paimana ban gaya hoon
Deewana ho raha hoon deewana ban gaya hoon
Deewana ban gaya hoon
Salma se dil laga kar
Basti ki ladkiyon mein badnaam ho raha hoon
In ki zubaan pe meri jitni kahaniyan hain
Kya janen yeh ke dil ki sab meherbaniyan hain
Kamsin hain be-khabar hain uthti jawaniyan hain
Kya samjhen gham ke hathon kyoon sar giraniyan hain
Kyoon khoon fishaniyan hain
Salma se dil laga kar
Basti ki ladkiyon mein badnaam ho raha hoon
Har ek ke reham ka yoon izhar ho raha hai
Be-charay ko yeh kaisa aazaar ho raha hai
Dekhe toh koi jaane beemar ho raha hai
Kis darja zindagi se bezaar ho raha hai
Nachaar ho raha hai
Salma se dil laga kar
Basti ki ladkiyon mein badnaam ho raha hoon
Jaun shikar ko gar ba-hamrahan-e-sehra
Khetton se ghoorti hain yoon dukhtaran-e-sehra
Bijli ki roshni ko jaise mayaan-e-sehra
Tareek shab mein dekhen kuchh aahuwaan-e-sehra
Hairat kashaan-e-sehra
Salma se dil laga kar
Basti ki ladkiyon mein badnaam ho raha hoon
Ek shokh chhedti hai is tarah paas aa kar
Dekho woh ja rahi hai Salma nazar bacha kar
Sharma ke muskura kar aanchal se munh chhupa kar
Jao na peechhe peechhe do baatein kar lo ja kar
Khetton mein chhup chhupa kar
Salma se dil laga kar
Basti ki ladkiyon mein badnaam ho raha hoon
Goya hamein hasad se kuchh nazneen nigahein
Salma ki bha gayi hain kyoon dilnasheen nigahein
In se ziyada dilkash hain yeh haseen nigahein
Alqissa ek dil hai so khashmgeen nigahein
Shauq aafreen nigahein
Salma se dil laga kar
Basti ki ladkiyon mein badnaam ho raha hoon
Ek shokh taza waarid sasural se ghar aa kar
Sakhiyon se poochhti hai jis dam mujhe bata kar
Yeh kaun hai toh zaalim kahti hain muskura kar
Tum is ka haal poocho Salma ke dil se ja kar
Yeh geet usay suna kar
Salma se dil laga kar
Basti ki ladkiyon mein badnaam ho raha hoon