برکھا رت — اختر شیرانی

Barkha Rut

Aasman par chha raha hai abr-e-paaron ka hujoom!
Nau-baharon ka hujoom
Aah yeh rangeen aawara nazaron ka hujoom
Kohsaron ka hujoom
Badliyan hain ya kisi ke bhoole bisre khwab hain
Be-khud o betaab hain!
Ya hawa par tairta hai rud-e-baron ka hujoom
Aabsharon ka hujoom
Phirti hain aawara matwali ghataen is tarah
Aur hawaen is tarah
Jhoomta phirta ho jaise mai-gusaron ka hujoom
Bada-khwaron ka hujoom
Waadi-e-Ganga hai, barkha rut hai, kaali raat hai
Raat hai barsaat hai
Aur faza mein tairne wale nazaron ka hujoom
Nasha zaron ka hujoom
Neeli goo'n pariyan ufuq mein par hain phailaye hue
Baal bikhraye hue
Ya umad aaya hai saawan ki baharon ka hujoom
Abr-e-paaron ka hujoom
Nannhi nannhi boondein girti hain hijab-e-abr se
Ya niqaab-e-abr se
Chhan raha hai qatre ban ban kar sitaron ka hujoom
Noor paaron ka hujoom
Yeh ghataen hain ke khwabon ke safeene hain rawaan
Be-qareene hain rawaan
Badbanon mein chhupaye chashma-saron ka hujoom
Juye baro'n ka hujoom
Bijli hai ya noor ki zanjeer lehrayi hui
Pech o kham khayi hui
Ya khameeda marmareen phoolon ke haro'n ka hujoom
Aur sitaron ka hujoom
Yeh samaan bijli ka yeh mahtaab ki si wadiyan
Khwab ki si wadiyan
Nashe mein bheega hua yeh sabza zaron ka hujoom
Kohsaron mein khushi ki bastiyan aabaad hain
Mastiyan aabaad hain
Chaar soo bikhra pada hai sabza zaron ka hujoom
Marghzaron ka hujoom
Yoon nazar aate hain kohsar Mussoorie door se
Mast se makhmur se
Joon samandar se jazeron ki qitaron ka hujoom
Sabza zaron ka hujoom
Yeh safar, yeh raat, yeh barsaat aur phir humsafar
Al-aman o al-hazar
Ek husn-e-yasmeen rangeen baharon ka hujoom
Maah paaron ka hujoom
Yeh suhane manzar Akhtar muddaton yaad aayenge
Muddaton tadpayenge
Aah yeh raat, uff yeh mastana nazaron ka hujoom
Yeh baharon ka hujoom