ایک حسن فروش سے — اختر شیرانی

Ek Husn Farosh Se

Mohabbat aah teri yeh mohabbat raat bhar ki hai
Teri rangeen khalwat ki latafat raat bhar ki hai
Tere shaadaab honto'n ki inayat raat bhar ki hai
Tere mastana boson ki halawat raat bhar ki hai
Mah roshan hai tu aur teri tal'at raat bhar ki hai
Gul-e-shab-boo hai tu aur teri nukhat raat bhar ki hai
Tu kya jaane ke sauday-e-mohabbat kis ko kehte hain
Mohabbat aur mohabbat ki latafat kis ko kehte hain
Gham-e-hijran hai kya aur soz-e-ulfat kis ko kehte hain
Junoon hota hai kaisa aur wehshat kis ko kehte hain
Tu kya jaane gham-e-shab-haye-furqat kis ko kehte hain
Tere izhaar-e-ulfat ki fasahat raat bhar ki hai
Nigah-e-mast se dil ko mere tadpa rahi hai tu
Ada-e-shauq se jazbaat ko bhadka rahi hai tu
Mujhe bachche ki soorat naaz se phisla rahi hai tu
Khilone de ke boson ke mujhe behla rahi hai tu
Magar nadan hai tu aah dhoka kha rahi hai tu
Tera ruye-e-darakhshan hai ba-zahir mahtaab aasa
Tere honto'n ki shadabi hai rangat mein sharab aasa
Tere rukhsar ki mahtabiyan hain aaftab aasa
Magar in ki haqeeqat hai habab aasa sarab aasa
Ke ghaze ki sabahat is pe chhayi hai naqaab aasa
Aur is ghaze ki bhi jhooti sabahat raat bhar ki hai
Yeh mana teri khalwat ki faza rooh-e-gulistan hai
Teri khalwat ka har fanoos ek mahtaab-e-larzan hai
Tera abresham-i bister nahin ek khwab-e-khandan hai
Tera jism aafat-e-dil tera seena aafat-e-jaan hai
Tu ek zinda sitara hai jo tanhayi mein tabaan hai
Magar kehte hain taron ki hukoomat raat bhar ki hai
Latafat se hain khaali tere kumhlaye hue bose
Tarawat se hain khaali tere murjhaye hue bose
Nazakat se hain khaali tere ghabraye hue bose
Haqeeqat se hain khaali tere sharmaye hue bose
Mohabbat se hain khaali tere ghabraye hue bose
Aur in boson ki yeh jhooti halawat raat bhar ki hai
Tere zehreele bose mujh ko jis dam yaad aayenge
Mere honto'n pe kale naag ban kar thartharayenge
Pashaimani ke jazbe mujh ko deewana banayenge
Mere inkaar ko nafrat ke khanjar gudgudayenge
Mere dil ki ragon mein gham ke sholay teer jayenge
Main samjha! Aah samjha! Yeh masarrat raat bhar ki hai
Mujhe deewana karne ki masarrat be-khabar kab tak
Rahegi mere dil mein teri ulfat kaargar kab tak
Mujhe mashoor rakhega yeh ishq be-samar kab tak
Haqeeqat ki sehar akhir na hogi parda dar kab tak
Mujhe maghloob kar ke khush hai tu zaalim magar kab tak
Teri yeh fateh meri yeh hazeemat raat bhar ki hai