ایک لڑکی کا گیت — اختر شیرانی

Ek Ladki Ka Geet

Jahan chiryan ghaneri jhariyon mein chehchahati hon
Jahan shaakhon pe kaliyan nat nayi khushboo lutati hon
Aur un par koelain koo koo karke meethe geet gaati hon
Wahan main hoon meri hum joliyan hon aur jhoola ho
Jahan barsaat ke mausam mein sabza lehlahata ho
Hawa ki chhed se ek ek patta thartharata ho
Jahan chashmon ka pani narm lay mein gungunata ho
Wahan main hoon meri hum joliyan hon aur jhoola ho
Jahan oonche paharon par ghataen ghir ke aati hon
Hawa ki god mein neelam ki pariyan muskurati hon
Aur apne neeli goo'n honto'n se moti mein lutati hon
Wahan main hoon meri hum joliyan hon aur jhoola ho
Jahan naharon mein behta pani moti sa chhalakta ho
Jahan charon taraf gulzar mein sabza lahakta ho
Jahan phoolon ki khushbooyon se ban ka ban mahakta ho
Wahan main hoon meri hum joliyan hon aur jhoola ho
Jahan phoolon ki khushbooyon se ban ka ban mahakta ho
Jahan baghon mein aur khetton mein har ya dil lahakta ho
Jahan tesu ke ek ek phool mein shola dahakta ho
Wahan main hoon meri hum joliyan hon aur jhoola ho
Jahan aamon ke hon baagh aur koi rakhwala na ho hargiz
Koi kutta bhi maali ne jahan pala na ho hargiz
Aur amma ji sa koi dekhne wala na ho hargiz
Wahan main hoon meri hum joliyan hon aur jhoola ho
Ilahi mere dil ki aarzoo jaldi se poori ho
Wahan le chal jahan is fasl mein jaana zaroori ho
Murree ho Shimla ho Solan ho Dalhousie ho Mussoorie ho
Wahan main hoon meri hum joliyan hon aur jhoola ho