ایک شاعرہ کی شادی پر — اختر شیرانی

Ek Sha'ira ki Shadi Par

Ae ke tha uns tujhe ishq ke afsanon se
Zindagani teri aabaad thi romanon se
Sher ki god mein palti thi jawani teri
Tere sher-on se ubalti thi jawani teri
Rashk-e-firdaus tha har husn bhara khwab tera
Ek pamal khilona tha yeh mehtab tera
Nikhath-e-sher se meheki hui rehti thi sada
Nashe-e-fikr mein baheki hui rehti thi sada
Shirkat-e-ghair se begana the naghme tere
Ismat-e-hoor ka afsanah the naghme tere
Sher ki khalwat-e-rangeen thi pari khanah tera
Mast khwabon ke jaziron mein tha kashana tera
Ghaib az chashm thi jannat ki baharon ki tarah
Dast-e-insan se thi mehfooz sitaron ki tarah
Sohbat-e-ghair se ghabrati thi tanhai teri
Aaine se bhi tu sharmati thi tanhai teri
Subh ki tarah se dosheeza thi hasti teri
Boo-e-gul ki tarah pakiza thi hasti teri
Naghma o sher ke firdaus mein tu rehti thi
Yaksar ilhaam o tarannum tha jo tu kehti thi
Tere ashaar the jannat ki baharon ke hujoom
Tere afkar the zarrin sitaron ke hujoom
Dard-e-she'ri ke ta'asur se tu maghmoom thi tu
Aasman ka magar ik ghuncha-e-masoom thi tu
Mauj-e-kausar ka chhalakta hua paimanah thi
Ghair honton ke tasavvur se bhi begana thi
Ab gawara hui kyun ghair ki sohbat tujh ko
Kyun pasand aa gai na-jins ki shirkat tujh ko
Auj-e-taqdees ko pasti ki ada bha gai kyun
Teri tanhai ki jannat pe khazan chha gai kyun
Sher o roman ke woh khwab kahan hain tere
Woh naqoosh-e-gul o mehtab kahan hain tere
Kaun si tarfah ada bha gai is duniya mein
Khuld ko chhod ke kyun aa gai is duniya mein
Ho gai aam tu noor-e-mah-e-taban ki tarah
Aah kyun jal na bujhi shama-e-shabistan ki tarah
Apni dosheeza baharon ko na khona tha kabhi
Woh kali thi tu jise phool na hona tha kabhi
Iffatain mit ke jawani ko mita jaati hain
Phool kumhlahate hain kaliyan kahin kumhlahati hain
Bulbul-e-mast nawa dasht mein kyun rehne lagi
Naghma-e-tar ki jagah marsiya kyun kehne lagi
Hawas aalooda hui pak jawani teri
Ghair ki raat hai ab aur kahani teri
Kis ko maloom tha tu is qadar arzan hogi
Zeenat-e-mehfil o pamal-e-shabistan hogi
Jazb-e-iffat ka mayassar tha jo irfan tujh ko
Kyun na marghoob hua shewa-e-janan tujh ko
Tareegi-e-hirs ki hooron ko bhi behka hi gai
Tere bistar pe bhi akhir ko shikan aa hi gai
Ab nahin tujh mein woh hooron ki si iffat baqi
Hoor thi tujh mein, gai, reh gai aurat baqi
Haan woh aurat jise bachchon ka afsanah kahe
Barbat-e-nafs ka ik fahash tarana kahe
Jis mein hai zehr-e-ufunat ka woh paimanah kahin
Ik gunahon ka bhabhakta hua mai-khanah kahin
Nauha khwan apni jawan maut ka hone de mujhe
Muskura tu magar is haal pe rone de mujhe