مجھے لے چل — اختر شیرانی

Mujhe Le Chal

Meri Salma! Mujhe le chal tu in rangeen baharon mein!
Jahan rangeen bahishtain khelti hain sabza zaron mein!
Jahan hooron ki zulfain jhoomti hain shakhsaron mein
Jahan pariyon ke naghme goonjte hain kohsaron mein
Jawani ki baharain tairti hain aabsharon mein
Meri Salma! Mujhe le chal tu in rangeen baharon mein
Woh mastana baharain jin pe qurban arz-e-jannat hai
Jahan har zarra ik gehwara-e-mauj-e-latafat hai
Jahan rangat hi rangat hai jahan nikhath hi nikhath hai
Mohabbat hukmaraan hai jin ke pakiza diyaron mein!
Meri Salma! Mujhe le chal tu in rangeen baharon mein!
Woh dosheeza fizaain jannaton ka hai gumaan jin par
Chhirakta hai mai-e-tasneem o kausar aasman jin par
Lutati hai sahab-e-husn o tal'at kahkashaan jin par
Suroor o noor o nikhath baste hain jin ke sitaron mein
Meri Salma! Mujhe le chal tu in rangeen baharon mein!
Jahan sham o sahar neeli ghataain ghir ke aati hain!
Ufaq ki god mein neelam ki pariyan muskurati hain!
Fizaon mein baharain hi baharain lehlahati hain
Jahan fitrat machalti hai lehakte abr paron mein!
Meri Salma! Mujhe le chal tu in rangeen baharon mein!
Jahan charon taraf bagh o gulistan lehlahate hain
Shagufta wadiyon mein jannaton ke khwab aate hain
Jahan masoom ta'ir ishq ke naghme sunate hain
Aur un ka lehan-e-shireen goonjta hai kohsaron mein!
Meri Salma! Mujhe le chal tu in rangeen baharon mein!
Hukumat hai jahan sidq o safa o mehr o ulfat ki
Nishat o aish o ishrat ki suroor o lutf o rahat ki
Naseem o anjum o gul ki nawa o noor o nikhath ki!
Mohabbat maujzan hai jin ke dosheeza nazaron mein
Meri Salma! Mujhe le chal tu in rangeen nazaron mein!
Jahan aabad yeh na-pak shahristan nahin hote
Fasadi fitna parvar aur zaleel insan nahin hote
Yeh insan, haan yeh haivan bad tar az shaitan nahin hote
Fasad o shar jahan sote hain khwabon ke mazaron mein!
Meri Salma! Mujhe le chal tu in rangeen nazaron mein!
Bahishton ki latafat hai jahan ki zindagani mein
Maza aata hai kausar ka jahan ke saada pani mein
Khudai husn uryaan hai jahan ki naujawani mein!
Sadaqat karwatein leti hai saz-e-dil ke taron mein
Meri Salma! Mujhe le chal tu in rangeen nazaron mein!
''Hayat-e-Da'imi'' likha hua hai jin ke aiwan par
Iram-zar-e-abad hai saya zan jin ke khayaban par
Dawamiyat ke jalwe chha rahe hain bagh o bustan par
Guzar mumkin nahin hai maut ka jin ke nazaron mein
Meri Salma! Mujhe le chal tu in rangeen nazaron mein
Mohabbat mein jo ho jata hai painda nahin marta!
Sadaqat jis ko kar deti hai tabinda nahin marta!
Hai jis mein ishq raqsan woh dil zinda nahin marta!
Nawa-e-''La Fana'' hai rooh ke khamosh taron mein
Meri Salma! Mujhe le chal tu in rangeen nazaron mein!