نذر وطن — اختر شیرانی

Nazr-e-Watan

Nazr-e-watan phir ay dil-e-deewana chahiye
Phir har qadam pe sajda-e-shukrana chahiye
Phir sarzameen-e-watan ki hai nazron ke saamne
Phir lab pe ek na'ra-e-mastana chahiye
Bachpan ki yaad leti hai phir dil mein chutkiyan
Phir bekhudi ba-hujjat-e-tiflana chahiye
Barson ke baad aaye hain baagh-e-watan mein hum
Phir har kali ko sajda-e-mastana chahiye
Kohsar sabz-posh nazar aaye door se
Phir lab pe chaar bait ka afsana chahiye
Jis kooche mein hueen kabhi ruswaiyan naseeb
Us ka tawaf ba-dil-e-deewana chahiye
Bakhsha tha jis ne pehle pehal dil ko dard-e-ishq
Phir us ke dar pe sajda-e-shukrana chahiye
Phir dil ko ho yaqeen na kisi ke visaal ka
Phir waqia ba-soorat-e-afsana chahiye
Phir shauq se milenge kisi gul-azar se
Phir lab pe shor bulbul-e-mastana chahiye
Jhoola jhoolayen ge kisi mast-e-shabaab ko
Raqsaan fiza mein phir may-o-mai-khana chahiye
Pay-e-talab ko wadi-e-parveen hai neem-gaam
Phir aarzoo ko manzil-e-jaanana chahiye
Phir kharman-e-sukoon ko hain darkar bijliyan
Phir be-hijaab jalwa-e-jaanana chahiye
Phir zauq-e-may-kashi ko hai me'raj ki talab
Kausar ka baada, chand ka paimana chahiye
Phir shauq ban ke dil mein dhadakti hai zindagi
Phir junbish-e-tabassum-e-jaanana chahiye
Phir seena-e-umeed mein raqsaan hai barq-e-toor
Phir pursish-e-mazaj-e-Kaleemana chahiye
Balay-e-koh saya-e-abr-e-bahar mein
Parveen-o-mahtab ka kashana chahiye
Phir is hareem-e-noor ke aaghosh-e-naaz mein
Ik gul-kada ba-rang-e-pari-khana chahiye
Phir abr-o-baagh-o-nikhat-o-gul ke hujoom mein
Sham'-o-sarv-o-baada-o-paimana chahiye
Phir us ki chashm-e-mast pe gesoo hon pur-fishan
Phir abr-e-shaam-goon sar-e-mai-khana chahiye
Phir chandni mein daaman-e-darya yeh ay Nadeem
Raqs-e-sharaab-o-gardish-e-paimana chahiye
Josh-e-tarab ne hash'r sa dil mein kiya bapa
Phir bekhudi ko girya-e-mastana chahiye
Akhtar watan mein aa ke khula hai yeh husn-e-raaz
Is mukhtasar si umr mein kya kya na chahiye