وقت کی قدر — اختر شیرانی

Waqt Ki Qadar

Dawat
Bahar beetne wali hai aa bhi ja Salma!
Chaman ki god mein aa kar sama bhi ja Salma!
Kali kali mein baharain basa bhi ja Salma!
Mujhe junoon ka sabaq phir padha bhi ja Salma!
Bahar beetne wali hai aa bhi ja Salma!
Milein ge hashr mein mat keh yeh bar bar mujhe
Ho kaise hashr ke waade pe aitbar mujhe
Khuda ke dil pe nahin koi ikhtiyar mujhe
Khuda ko maan yehi hashr utha bhi ja Salma!
Bahar beetne wali hai aa bhi ja Salma!
Nishat-e-umr ko ummeed par nisar na kar
Visal-e-subh-e-qayamat ka intizar na kar
Riyaz-e-khuld ki baaton ka aitbar na kar
Fareb-e-waada-e-farda mita bhi ja Salma!
Bahar beetne wali hai aa bhi ja Salma!
Kise khabar hai qayamat mein hum milein na milein
Fiza-e-rauza-e-jannat mein hum milein na milein
Kashakash-e-abadiyat mein hum milein na milein
Kashakash-e-abadiyat bhula bhi ja Salma!
Bahar beetne wali hai aa bhi ja Salma!
Gawa na sog mein apne shabab ki raatain
Nazar na aayen gi phir mehtab ki raatain
Yeh nikhathon ka hujoom aur yeh khwab ki raatain
Fiza mein khwab-e-haseen ban ke chha bhi ja Salma!
Bahar beetne wali hai aa bhi ja Salma!
Khabar le jald ke umr-e-aziz fani hai
Sara-e-dahr ki har cheez aani jani hai
Barang-e-abr rawan fasl-e-naujawani hai
Chhalkane wala hai saghar pila bhi ja Salma!
Bahar beetne wali hai aa bhi ja Salma!
Kise khabar yeh ghataain rahein rahein na rahein
Yeh nikhathain yeh hawaain rahein rahein na rahein
Yeh mastiyan yeh fizaain rahein rahein na rahein
Sharab-e-vasl ka saghar pila bhi ja Salma!
Bahar beetne wali hai aa bhi ja Salma!
Sabat-e-ahd-e-zamane mein kisi ne paya hai
Zamana rang badalne ko rang laya hai
Bahar-e-umr rawan badalon ka saya hai
Bahar-e-umr ki khushiyan mana bhi ja Salma!
Bahar beetne wali hai aa bhi ja Salma!
Tere khayal ko dil mein basaye baithe hain
Khudai ho ke khuda ho bhulaye baithe hain
Suroor-e-ahd-e-jawani lutaye baithe hain
Tu aa ke qadar-e-jawani sikha bhi ja Salma!
Bahar beetne wali hai aa bhi ja Salma!
Yeh fasl aur yeh baharain nazar na aayen gi phir
Yeh badalon ki qatarain nazar na aayen gi phir
Yeh halki halki phuwarain nazar na aayen gi phir
Sharab-e-aish-e-masarrat luandha bhi ja Salma!
Bahar beetne wali hai aa bhi ja Salma!
Bata tu kya yeh nazare ujad na jayen ge
Yeh nadiyan yeh kinare ujad na jayen ge
Yeh chand aur yeh sitare ujad na jayen ge
Sitarah war shua'ain luta bhi ja bhi ja Salma!
Bahar beetne wali hai aa bhi ja Salma!
Ghamon pe ki hain fida shadmaniyan hum ne
Khuda ke naam pe taj deen jawanian hum ne
Guzar di hain yunhi zindaganiyan hum ne
Dam-e-akheer tu gham se chhudha bhi ja Salma!
Bahar beetne wali hai aa bhi ja Salma!
Fana naseeb hain yeh sabza zar ke manzar
Yeh kohsar dil-e-jooy-bar ke manzar
Nazar na aayen ge phir yeh bahar ke manzar
Abhi samaan hai baharain dikha bhi ja Salma!
Bahar beetne wali hai aa bhi ja Salma!
Khabar le jald ke baheki hui bahar hai aaj
Nishat-e-khuld se ma'moor sabza zar hai aaj
Ajal pe bhi meri hasti ko ikhtiyar hai aaj
Ghuroor-e-ishq ki himmat badha bhi ja Salma!
Bahar beetne wali hai aa bhi ja Salma!
Tu hukm de to sitaron ko chheen laaun mein
Falak se us ke nazaron ko chheen laaun mein
Iram ki mast baharon ko chheen laaun mein
Khudai ko yeh tamasha dikha bhi ja Salma!
Bahar beetne wali hai aa bhi ja Salma!
Tu samne ho to kaun o makan ko gum kar doon
Kham-e-tarab mein kham-e-aasman ko gum kar doon
Dui ho fard to donon jahan ko gum kar doon
Barang-e-rooh badan mein sama bhi ja Salma!
Bahar beetne wali hai aa bhi ja Salma!