وہ کہتے ہیں رنجش کی باتیں بھلا دیں — اختر شیرانی
شاعر
وہ کہتے ہیں رنجش کی باتیں بھلا دیں
وہ کہتے ہیں رنجش کی باتیں بھلا دیں
محبت کریں خوش رہیں مسکرا دیں
غرور اور ہمارا غرور محبت
مہ و مہر کو ان کے در پر جھکا دیں
جوانی ہو گر جاودانی تو یا رب
تری سادہ دنیا کو جنت بنا دیں
شب وصل کی بے خودی چھا رہی ہے
کہو تو ستاروں کی شمعیں بجھا دیں
بہاریں سمٹ آئیں کھل جائیں کلیاں
جو ہم تم چمن میں کبھی مسکرا دیں
عبادت ہے اک بے خودی سے عبارت
حرم کو مے مشک بو سے بسا دیں
وہ آئیں گے آج اے بہار محبت
ستاروں کے بستر پہ کلیاں بچھا دیں
بناتا ہے منہ تلخی مے سے زاہد
تجھے باغ رضواں سے کوثر منگا دیں
جنہیں عمر بھر یاد آنا سکھایا
وہ دل سے تری یاد کیونکر بھلا دیں
تم افسانۂ قیس کیا پوچھتے ہو
ادھر آؤ ہم تم کو لیلیٰ بنا دیں
یہ بے دردیاں کب تک اے درد غربت
بتوں کو پھر ارض حرم میں بسا دیں
وہ سرمستیاں بخش اے رشک شیریں
کہ خسرو کو خواب عدم سے جگا دیں
ترے وصل کی بے خودی کہہ رہی ہے
خدائی تو کیا ہم خدا کو بھلا دیں
انہیں اپنی صورت پہ یوں ناز کب تھا
مرے عشق رسوا کو اخترؔ دعا دیں
Woh kehte hain ranjish ki baatein bhula dein
Woh kehte hain ranjish ki baatein bhula dein
Mohabbat karen khush rahein muskura dein
Ghuroor aur hamara ghuroor-e-mohabbat
Mah o mehr ko un ke dar par jhuka dein
Jawaani ho gar jaavedaani to ya Rabb
Teri saada duniya ko jannat bana dein
Shab-e-vasl ki be-khudi chha rahi hai
Kaho to sitaron ki sham'ein bujha dein
Baharein simat aayen khil jaayen kaliyaan
Jo hum tum chaman mein kabhi muskura dein
Ibadat hai ik be-khudi se ibaarat
Haram ko mai-e-mushk-boo se basa dein
Woh aayenge aaj aye bahar-e-mohabbat
Sitaron ke bistar pe kaliyaan bichha dein
Banata hai munh talkhi-e-mai se zaahid
Tujhe Bagh-e-Rizwan se kausar manga dein
Jinhein umr bhar yaad aana sikhaya
Woh dil se teri yaad kyunkar bhula dein
Tum afsaana-e-Qais kya poochhte ho
Idhar aao hum tum ko Laila bana dein
Ye be-dardiyaan kab tak aye dard-e-ghurbat
Buton ko phir arz-e-haram mein basa dein
Woh sarmastiyaan bakhsh aye rashk-e-Shireen
Ke Khusrau ko khwab-e-adam se jaga dein
Tere vasl ki be-khudi keh rahi hai
Khudai to kya hum Khuda ko bhula dein
Unhein apni soorat pe yun naaz kab tha
Mere ishq-e-ruswa ko Akhtar! dua dein
شاعر کے بارے میں
اختر شیرانی (اصل نام محمد دائود خان) اردو ادب کے ممتاز رومانوی شاعر تھے۔ وہ 4 مئی 1905ء کو ریاست ٹونک، برطانوی ہندوستان میں پیدا ہوئے۔ ان کا تعلق پ...
مکمل تعارف پڑھیں