اپاہج گاڑی کا آدمی — اخترالایمان

Apahaj Gaadi ka Aadmi

Kuch aise hain jo zindagi ko mah-o-saal se naapte hain
Gosht se saag se daal se naapte hain
Khat-o-khaal se gaisuon ki mehak chaal se naapte hain
Sa'oobat se janjaal se naapte hain
Ya apne a'maal se naapte hain
Magar hum use azm-e-pamaal se naapte hain
Yeh lamha jo guzra mere khoon ki is mein surkhi mili hai?
Mere aansuon ka namak is ki lazzat mein shamil hua hai?
Paseene se gardaab saahil hua hai?
Yeh la ka safar la rahega ke kuch is ka haasil hua hai
Ke jaise thi barson se waisi hi tishna-dili hai?
Main kab se zameen par zameen ki tarah chal raha hoon
Yeh deewana andha safar kab kahan ja ke chhodega mujh ko?
Main is zindagi ki bahut si baharein ghiza ki tarah kha chuka hoon
Pehan odh kar pairahan ki tarah phaad di hain
Main resham ka keeda hoon koye mein chhup jaata hoon dar ke maare
Isi koye ko khaata rehta hoon aur kaat kar is se aata hoon bahar
Aur apne jeene ka maqsad sabab jaanna chahta hoon
Mera dil Khuda ki raza dhoondhta phir raha hai
Mera jism lazzat ki justujoo mein laga hai
Guzar-gah-e-shaam-o-sehar par kahin ek din mein uga tha
Nabataat ki tarah jeeta hoon is kaargah-e-jahan mein
Na ehsaas-e-imaan-o-eeqaq koi
Na duniya mein shamil na khud apni pehchan koi
Gunah aur Jahannum sawab aur Jannat?
Yeh kyun hai ke be-mazd kuch bhi nahi mil saka hai
Na kal mil sakenge
Asateer farmaan rawaon ke ehkaam aur sufiya ki karamat ke qisse
Paigambar ki dil-soziyon ke mazahir
Qalam band hain sab!
Inhen hum ne taaweez ki tarah apne galuon mein hama'il kiya hai
Inhen hum ne teh-khanon ki kothri mein muqaffal kiya hai
Jahan ladkhadate hain un ki madad le ke chalte hain aage
Magar raaston ka ta'ayyun nahi hai!
Main bikhra hua aadmi hoon
Meri zehni beemariyon ka sabab yeh zameen hai
Main us din se darta hoon jab barf saari pighal kar
Use gharq kar de
Naye aasmani hawadis
Sifar mein badal dein
Ya aadmi apne a'maal se khud
Use ek kahani bana de
Zameen shora pushton ki aamajgah ban gayi hai
Khuda ek hai yoon to waaween mein saaf likha hua hai
Magar zair-e-waaween bhi chhoti chhoti bahut takhtiyan hain
Jali harf jin ke bahut ummaton ka pata de rahe hain
Jo yeh takhtiyan apni gardan mein latkaye
Zunnar pehne hue koi tasbeeh thame
Apni gard-e-safar ke dhund mein lipte chale ja rahe hain
Zaitoon ki shaakh Tulsi ke patte
Hawa mein ude ja rahe hain
Cheuntiyon ki qatarein qarn dar qarn
Mukhtalif pech dar pech raahon se guzri chali ja rahi hain
Saikadon sar kate dhad bahut raaston par pade hain
Hawan ho rahe hain
Yagya ke mantron ki sada
Aag mein jalne wali saamagri ki bahut tez bu
Har taraf phail kar bas gayi hai hawa mein
Aur waaween ki qaid mein jo Khuda hai
La-makaan se
Jo hota hai hota rahega
Baitha chup chaap sab dekhta hai
Hum bhi kyun na Khuda ki tarah yoonhi chup saadh lein
Ped paudon ki maanind jeete rahein
Zabah hote rahein!
Woh duaen jo barood ki bu mein bas kar
Bhatakti hui zair-e-arsh-e-bareen phir rahi hain
Inhen bhool jaen
Zindagi ko Khuda ki ata jaan kar zehn ma'oof kar lein
Yaawa-goi mein ya zehni hazyaan mein khud ko masroof kar lein
In mein mil jaen jo zindagi ko
Gosht se saag se daal se naapte hain
Mah-o-saal se naapte hain
Apna hi khoon peene lage hain
Chak-e-daamaniyaan gham se seene lage hain