اذیت پرست — اخترالایمان

Azziyat Parast

Main ba-zahir jo bahut saada hoon be-hiss nazar aata hoon tumhein
Aisa darya hoon jahan satah ke neeche chup chaap
Maujen shorida hain, toofaan utha karte hain
Thehra paani hoon, magar is mein bhanwar padte hain
Zakhm sab apne chhupaye hain, hansi ke peechhe
Sirf is waste shanon pe rida-e-tehzeeb
Daale rehta hoon ke haivan na kahe koi mujhe
Woh saqafat jise kehte hain, asasa, warna
Saal ha saal ki mehnat hai jo insaanon ki
Mere ek fa'el se gharat na kahin ho jaye
Warna tum saamne aati ho to sar se pa tak
Daud jati hai kabhi aag si tezab sa ek shola sa
Tum ko maloom hai is daur mein mere din raat
Sirf is waste ba-ma'ani hain tum saamne ho
Tum ko maloom hai yeh gardish-e-ayyam mujhe
Kyun bhali lagti hai, kyun dekh ke tum ko aankhein
Muskura uthti hain, main shad nazar aata hoon
Main jo is phaili hui duniya mein yun jeeta tha
Jaise yeh basti nahin, shahar hai ek lashon ka
Jis mein insaan nahin murde hain kafan pehne hue
Aur un murdon mein lab sokhta, main bhi hoon kahin
Tum ne ehsaas dilaya nahin, main lash nahin
Apni guftaar ki garmi se hararat bakhshi
Munjamid khoon ko dauda diya shiryanon mein
Kheencha layeen mujhe, tanhai ki duniya se yahan
Main Alf Laila ka kirdar nahin hoon koi
Tum bhi afsanvi mehbooba nahin aur na theen
Phir riwayati sitam kyun kiya tum ne mujh par?
Khud hi warifta hueen, kheench gayeen khud hi aise
Jaise main waqai ek lash hoon chalti phirti
Ab tumhein dekh ke main dil se dua karta hoon
Lash ban jaaun main, sach much hi, yeh begana ravi
Yeh naya tarz-e-wafa, tum ne jo seekha hai abhi
Kachche sheeshe ki tarah toot ke reza ho jaye
Aur tum mujh se har ek khauf ko thukrate hue
Cheekh kar aise lipat jao, kaleja phat jaye!