کوزہ گر — اخترالایمان
شاعر
کوزہ گر
کہیں قومیت ہے کہیں ملک و ملّت کی زنجیر ہے
کہیں مذہبیت، کہیں حریت، ہر قدم پر عناں گیر ہے
اگر میں یہ پردہ ہٹا دوں جسے لفظ ماضی سے تعبیر کرتے رہے ہیں
اگر میں حدود زماں و مکاں سب مٹا دوں
اگر میں یہ دیواریں جتنی کھڑی ہیں گرا دوں
تو ہر قید اُٹھ جائے، یہ زندگی جو قفس ہے
یوں ہی دیکھتے دیکھتے تیلیاں سب بکھیر جائیں اس کی
اور انسان اپنے صحیح رُوپ میں ہر جگہ دے دکھائی
کسی غار کے منہ پہ بیٹھا، کسی سخت اُلجھن میں غلطاں
کہیں شعلہ دریافت کر نے کی خواہش میں پیچاں
کہیں زندگی کو نظام و تسلسل میں لانے کا خواہاں
جہاں کو حسیں دیکھنے کی تمنّا میں کوشاں
زمیں دور تک ایسے پھیلی ہوئی ہے
کشادہ کوئی خوانِ نعمت ہے جیسے
جہاں کوئی پہرہ نہیں کوئی تخصیص و تفریق انساں
یہ سب کی ہے سب کے لیے ہے یہاں سب ہیں مدعو!
میں اس شخص کو ڈھونڈتا ہوں جو بانیِ شر ہے
جو رشیوں، رسولوں کی محنت کو برباد کرتا رہا ہے
میں اس شخص کو ڈھونڈتا ہوں جو ہر دور میں بے محابا
نئے بھیس میں سامری بن کے آتا ہے اور موہتا ہے دلوں کو
اسے ڈھونڈتا ہوں میں جس نے ہر اِک خوان نعمت یہ پہرے لگائے
زمیں کو زمیں سے الگ کر دیا سیکڑوں نام دے کر
اجارہ کی بنیاد ڈالی، کیا جاری پروانۂ راہ داری
بجائے حسیں اعلیٰ قدروں کے تاسیس عالم
رکھی مصلحت پر، مفادات پر، خود پرستی پہ ساری
اور انسان کو خام اشیا میں تبدیل کر کے
بہت پہلے اس سے کہ انسان انسان بنتا
اسے ایک شطرنج کا چوبی مہرہ بنا کر
مقابل کھڑا کر دیا ایک کو دوسرے کے
کہاں ہے وہ قوت وہ ہستی جو یوں عصر کی روح بن کر
فضاؤں کو مسموم کرتی ہے لاشوں سے بھر دیتی ہے خندقوں کو
میں للکارتا ہوں اسے وہ اگر اتنا ہی جادو گر ہے
تو سورج کو مشرق کے بدلے نکالے کبھی آ کے مغرب سے اِک لمحہ بھر کو
ہواؤں کی تاثیر بدلے پہاڑوں کو لاوے میں تبدیل کر دے
سمندر سکھا دے، ہر اِک جلتے صحرا کو زرخیز میداں بنا دے
اصول مشیت بدل دے، زمین آسمانوں کے سب سلسلے توڑ ڈالے
مگر میں اسے کیسے للکار سکتا ہوں، یہ تو خدا ہے
حیات و نمو کی وہ قوت، تغیر جو خود سامری ہے
یہ وہ کوزہ گر ہے جو خود مسخ کرتا ہے چہرے بنا کر
یہ وہ کوزہ گر ہے اسی ایک مٹّی کو ہر بار متھ کر
بنا کر نئے ظرف رکھتا ہے کچھ دیر شیشیوں کے پیچھے سجا کر
انھیں خود ہی پھر توڑ دیتا ہے سب ظرف کوزے قوانین اخلاق سارے
جہاں اتنی شکلیں بنائی بگاڑی ہیں یہ زندگی کا نیا بت بھی اِک دن
فراموش گاری کے اس ڈھیر میں پھینک دے گا جہاں ایسی کتنی ہی چیزیں پڑی ہیں
کہ یہ چاک تو چل رہا ہے یوں ہی آفرینش سے گردش میں ہے اور رہے گا!
Kooza Gar
Kahin qoumiyat hai kahin mulk o millat ki zanjeer hai
Kahin mazhabiyat, kahin hurriyet, har qadam par inaan geer hai
Agar main yeh parda hata doon jise lafz-e-maazi se ta'beer karte rahe hain
Agar main hudood-e-zamaan o makaan sab mita doon
Agar main yeh deewaren jitni khadi hain gira doon
To har qaid uth jaye, yeh zindagi jo qafas hai
Yun hi dekhte dekhte teeliyan sab bikher jayen is ki
Aur insaan apne sahih roop mein har jagah de dikhai
Kisi ghaar ke munh pe baitha, kisi sakht uljhan mein ghaltaan
Kahin shola daryaft kar ne ki khwahish mein pechaan
Kahin zindagi ko nizaam o tasalsul mein laane ka khwahan
Jahan ko haseen dekhne ki tamanna mein koshan
Zameen door tak aise phaili hui hai
Kushada koi khwan-e-ni'mat hai jaise
Jahan koi pehra nahin koi takhsees o tafreeq insaan
Yeh sab ki hai sab ke liye hai yahan sab hain mad'u!
Main us shakhs ko dhundhta hoon jo baani-e-shar hai
Jo reshiyon, rasoolon ki mehnat ko barbaad karta raha hai
Main us shakhs ko dhundhta hoon jo har daur mein be-muhaba
Naye bhes mein Saamri ban ke aata hai aur mohta hai dilon ko
Use dhundhta hoon main jis ne har ik khwan-e-ni'mat yeh pehre lagaye
Zameen ko zameen se alag kar diya sainkdon naam de kar
Ijarah ki bunyad daali, kiya jari parwana-e-rahdari
Bajaye haseen aala qadron ke tasees-e-alam
Rakhhi maslihat par, mufadaat par, khud parasti pe saari
Aur insaan ko khaam ashiya mein tabdeel kar ke
Bahut pehle is se ke insaan insaan banta
Use ek shatranj ka choobi mohra bana kar
Muqabil khada kar diya ek ko doosre ke
Kahan hai woh quwwat woh hasti jo yun asr ki rooh ban kar
Fazaon ko masmoom karti hai lashon se bhar deti hai khandaqon ko
Main lalkarta hoon use woh agar itna hi jadoogar hai
To suraj ko mashriq ke badle nikale kabhi aa ke maghrib se ik lamha bhar ko
Hawaon ki taseer badle pahadon ko laawe mein tabdeel kar de
Samundar sukha de, har ik jalte sehra ko zarkhez maidan bana de
Usool-e-mashiyat badal de, zameen aasmanon ke sab silsile tod daale
Magar main use kaise lalkar sakta hoon, yeh to Khuda hai
Hayat o namoo ki woh quwwat, taghayyur jo khud Saamri hai
Yeh woh kooza gar hai jo khud masakh karta hai chehre bana kar
Yeh woh kooza gar hai isi ek mitti ko har baar muth kar
Bana kar naye zarf rakhhta hai kuch der shishiyon ke peechhe saja kar
Unhein khud hi phir tod deta hai sab zarf koze qawaneen-e-akhlaaq saare
Jahan itni shaklein banai bigaadi hain yeh zindagi ka naya but bhi ik din
Faramosh gaari ke is dher mein phenk dega jahan aise kitni hi cheezen padi hain
Ke yeh chaak to chal raha hai yun hi aafreenish se gardish mein hai aur rahega!
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں