یہ دور — اخترالایمان
شاعر
یہ دور
نہ وہ زمیں ہے، نہ وہ آسماں، نہ وہ شب و روز
کبھی سمٹتی کبھی پھیلتی ہیں غم کی حدود
ٹھہر گئی ہے اِک ایسے مقام پر دنیا
جہاں نہ رات نہ دن ہے نہ بے کلی نہ جمود
پکارتے ہیں ستارے سنبھالتی ہے زمیں
ہر ایک شئے سے گریزاں ابھی ہے میرا وجود
میں سوچتا ہوں کہیں زندگی نہ بن جائے
خزاں بدوش بہاریں، خمار زہر آلود!
میں اسی طور سے گرداں ہوں زمانے میں، وہی
صبح ہے، شام ہے، گہنائی ہوئی راتیں ہیں
کوئی آغاز، نہ انجام، نہ منزل نہ سفر
سب وہی دوست ہیں، دہرائی ہوئی باتیں ہیں
چہرے اُترے ہوئے دن رات کی محنت کے سبب
سب وہی بغض و حسد، رشک و رقابت، شکوے
دام تزویر ہے، اُلجھاؤ کی سو گھاتیں ہیں
سب گلی کوچے وہی، لوگ وہی، موڑ وہی
یہ وہی سردی ہے، یہ گرمی، یہ برساتیں ہیں
زلف کی بات ہے یا زہر کہ سب ڈرتے ہیں
کوئی دل دار، نہ دل بر، نہ ملاقاتیں ہیں
کوئی بشاش ہنسی، جینے کی نوخیز اُمنگ
کچھ نہیں بس غم و اندوہ کی باراتیں ہیں
تنگ دامانی کا شکوہ ہے خدا سے ہر وقت
ہر مرض کے لیے نسخے میں مناجاتیں ہیں
جی اُلٹ جاتا ہے اس حبس مسلسل سے مرا
ذہن جاتا ہے کسی نازش خوبی کی طرف
یعنی وہ پرتو گل خانہ بر انداز چمن
ایک پروائی کا جھونکا سا گھنی بدلی سی
شاہد نکہت و انوار سحر، راحت من
رسم دلداری ہے اس سیم بدن کے دم سے
اور مرے دم سے ہے عشاق کا بے داغ چلن
کس کے قدموں کی ہے یہ چاپ یقیناً ہے وہی
یہ یقیناً ہے وہی سرو چمن، بنت بہار
کوئی رُت آئے زمانہ نہیں بدلے گا اسے
جان من تم ہو؟ نہیں ! وہ لب و عارض وہ نکھار؟
نغمگی جسم کی، وہ لوچ سا نشہ سا مدام
ایک چلتا ہوا جادو سا نگاہوں کا قرار؟
سچ کہو تم ہی ہو؟ آتا نہیں آنکھوں کو یقیں؟
Yeh Daur
Na woh zameen hai, na woh aasmaan, na woh shab o roz
Kabhi simat-ti kabhi phailti hain gham ki hudood
Theher gayi hai ek aise maqam par duniya
Jahan na raat na din hai na be-kali na jumood
Pukarte hain sitare sanbhal-ti hai zameen
Har ek shai se gurezan abhi hai mera wujood
Main sochta hoon kahin zindagi na ban jaye
Khizaan badosh baharein, khumar zehar aalood!
Main isi taur se gardaan hoon zamane mein, wahi
Subah hai, shaam hai, gehnai hui raaten hain
Koi aaghaz, na anjaam, na manzil na safar
Sab wahi dost hain, dohrai hui baatein hain
Chehre utre hue din raat ki mehnat ke sabab
Sab wahi bughz o hasad, rashk o raqabat, shikwe
Daam-e-tazweer hai, uljhao ki sau ghaaten hain
Sab gali kuche wahi, log wahi, mod wahi
Yeh wahi sardi hai, yeh garmi, yeh barsaten hain
Zulf ki baat hai ya zehar ke sab darte hain
Koi dil daar, na dilbar, na mulaqaten hain
Koi bashash hansi, jeene ki naukhez umang
Kuch nahin bas gham o andoh ki baraaten hain
Tang damani ka shikwa hai Khuda se har waqt
Har marz ke liye nuskhe mein munajaaten hain
Jee ult jata hai is habs musalsal se mera
Zehn jata hai kisi nazish-e-khoobi ki taraf
Yaani woh partav-e-gul khana bar andaaz-e-chaman
Ek parwai ka jhonka sa ghani badli si
Shaahid-e-nukhat o anwaar-e-sehar, rahat-e-mann
Rasm-e-dildari hai is seem badan ke dum se
Aur mere dum se hai ushshaaq ka be daagh chalan
Kis ke qadmon ki hai yeh chaap yaqeenan hai wahi
Yeh yaqeenan hai wahi sarv-e-chaman, bint-e-bahar
Koi rut aaye zamana nahin badlega use
Jaan-e-man tum ho? Nahin! Woh lab o aariz woh nikhaar?
Naghmagi jism ki, woh loch sa nasha sa mudaam
Ek chalta hua jadoo sa nigahon ka qarar?
Sach kaho tum hi ho? Aata nahin aankhon ko yaqeen?
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں