اپاہج گاڑی کا آدمی — اخترالایمان

Apahij Gaadi Ka Aadmi

Kuch aise hain jo zindagi ko mah-o-saal se napte hain
Gosht se, saag se, daal se napte hain
Khat-o-khaal se, gesuon ki mahak, chaal se napte hain
Sa'oobat se, janjaal se napte hain
Ya apne a'amaal se napte hain
Magar hum use azm-e-pamaal se napte hain
Yeh lamha jo guzra, mere khoon ki is mein surkhi mili hai?
Mere aansuon ka namak is ki lazzat mein shamil hua hai?
Paseene se gardaab sahil hua hai?
Yeh 'la' ka safar 'la' rahega ke kuch is ka haasil hua hai
Ke jaise thi barson se waisi hi tishna dili hai?
Main kab se zameen par zameen ki tarah chal raha hoon
Yeh deewane andha safar kab kahan ja ke chhode ga mujh ko?
Main is zindagi ki bahut si baharein ghiza ki tarah kha chuka hoon
Pahan odh kar pairahan ki tarah phaad di hain
Main resham ka keeda hoon, koye mein chhup jata hoon dar ke maare
Isi koye ko khata rehta hoon aur kaaṭ kar is se aata hoon bahar
Aur apne jeene ka maqsad, sabab janna chahta hoon
Mera dil Khuda ki raza dhoondhta phir raha hai
Mera jism lazzat ki justujoo mein laga hai
Guzar-gah-e-shaam-o-sehar par kahin ek din mein uga tha
Nabataat ki tarah jeeta hoon is kaargah-e-jahan mein
Na ehsaas-e-imaan-o-eeqan koi
Na duniya mein shamil, na khud apni pehchan koi
Gunah aur jahannum, sawaab aur jannat?
Yeh kyun hai ke be-mazd kuch bhi nahi mil saka hai
Na kal mil sakenge
Asateer, farmaan rawaon ke ehkaam aur sufiya ki karamat ke qisse
Paighambar ki dil soziyon ke mazahir
Qalam band hain sab!
Inhein hum ne ta'awiz ki tarah apne galuon mein hamail kiya hai
Inhein hum ne teh-khano ki koṭhri mein muqaffal kiya hai
Jahan ladkhadate hain, in ki madad le ke chalte hain aage
Magar raaston ka ta'ayyun nahi hai!
Main bikhra hua aadmi hoon
Meri zehni beemariyon ka sabab yeh zameen hai
Main us din se darta hoon jab barf saari pighal kar
Use gharq kar de
Naye aasmani hawadis
Safar mein badal dein
Ya aadmi apne a'amaal se khud
Use ek kahani bana de
Zameen shorah-pushton ki aamaajgah ban gayi hai
Khuda ek hai yun toh wawain mein saaf likha hua hai
Magar zer-e-wawain bhi chhoti chhoti bahut takhtiyan hain
Jali harf jin ke bahut ummaton ka pata de rahe hain
Jo yeh takhtiyan apni gardan mein latkaye
Zunnar pahne hue, koi tasbeeh thame
Apni gard-e-safar ke dhund mein lipte chale ja rahe hain
Zaitoon ki shaakh, Tulsi ke patte
Hawa mein ude ja rahe hain
Chiuntiyon ki qatarein qarn dar qarn
Mukhtalif pech dar pech raahon se guzri chali ja rahi hain
Sainkron sar kaṭe dhad bahut raaston par pade hain
Hawan ho rahe hain
Yagya ke mantron ki sada
Aag mein jalne wali saamgari ki bahut tez boo
Har taraf phail kar bas gayi hai hawa mein
Aur wawain ki qaid mein jo Khuda hai
La-makaan se
Jo hota hai, hota rahega
Baitha chup chaap sab dekhta hai
Hum bhi kyun na Khuda ki tarah yunhi chup saadh lein
Ped paudon ki maanind jeete rahein
Zabah hote rahein!
Woh dua'ein jo barood ki boo mein bas kar
Bhaṭakti hui zer-e-arsh-e-bareen phir rahi hain
Inhein bhool jayen
Zindagi ko Khuda ki ata jaan kar zehn ma'oof kar lein
Yawah-goi mein ya zehni hizyan mein khud ko masroof kar lein
In mein mil jayen jo zindagi ko
Gosht se, saag se, daal se napte hain
Mah-o-saal se napte hain
Apna hi khoon peene lage hain
Chaak daamaniyaan gham se seene lage hain