باز آمد ۔۔۔ ایک منتاج — اخترالایمان
شاعر
باز آمد ۔۔۔ ایک منتاج
تتلیاں ناچتی ہیں
پھول سے پھول پہ یوں جاتی ہیں
جیسے اک بات ہے جو
کان میں کہنی ہے خاموشی سے
اور ہر پھول ہنسا پڑتا ہے سن کر یہ بات
دھوپ میں تیزی نہیں
ایسے آتا ہے ہر اک جھونکا ہوا کا جیسے
دست شفقت ہے بڑی عمر کی محبوبہ کا
اور مرے شانوں کو اس طرح ہلا جاتا ہے
جیسے میں نیند میں ہوں
عورتیں چرخے لیے بیٹھی ہیں
کچھ کپاس اوٹتی ہیں
کچھ سلائی کے کسی کام میں مصروف ہیں یوں
جیسے یہ کام ہے دراصل ہر اک شے کی اساس
ایک سے ایک چہل کرتی ہے
کوئی کہتی ہے مری چوڑیاں کھنکیں تو کھنکھاری مری ساس
کوئی کہتی ہے بھری چاندنی آتی نہیں راس
رات کی بات سناتی ہے کوئی ہنس ہنس کر
بات کی بات سناتی ہے کوئی ہنس ہنس کر
لذت وصل ہے آزار، کوئی کہتی ہے
میں تو بن جاتی ہوں بیمار، کوئی کہتی ہے
میں بھی گھس آتا ہوں اس شیش محل میں دیکھو
سب ہنسی روک کے کہتی ہیں نکالو اس کو
اک پرندہ کسی اک پیڑ کی ٹہنی پہ چہکتا ہے کہیں
ایک گاتا ہوا یوں جاتا ہے دھرتی سے فلک کی جانب
پوری قوت سے کوئی گیند اچھالے جیسے
اک پھدکتا ہے سر شاخ پہ جس طرح کوئی
آمد فصل بہاری کی خوشی میں ناچے
گوندنی بوجھ سے اپنے ہی جھکی پڑتی ہے
نازنیں جیسے ہے کوئی یہ بھری محفل میں
اور کل ہاتھ ہوئے ہیں پیلے
کوئلیں کوکتی ہیں
جامنیں پکی ہیں، آموں پہ بہار آئی ہے
ارغنوں بجتا ہے یکجائی کا
نیم کے پیڑوں میں جھولے ہیں جدھر دیکھو ادھر
ساونی گاتی ہیں سب لڑکیاں آواز ملا کر ہر سو
اور اس آواز سے گونج اٹھی ہے بستی ساری
میں کبھی ایک کبھی دوسرے جھولے کے قریں جاتا ہوں
ایک ہی کم ہے، وہی چہرہ نہیں
آخرش پوچھ ہی لیتا ہوں کسی سے بڑھ کر
کیوں حبیبہ نہیں آئی اب تک؟
کھلکھلا پڑتی ہیں سب لڑکیاں سن کر یہ نام
لو یہ سپنے میں ہیں، اک کہتی ہے
باؤلی سپنا نہیں، شہر سے آئے ہیں ابھی
دوسری ٹوکتی ہے
بات سے بات نکل چلتی ہے
ٹھاٹ کی آئی تھی بارات، چنبیلی نے کہا
بینڈ باجا بھی تھا، دیپا بولی
اور دلہن پہ ہوا کتنا بکھیر
کچھ نہ کچھ کہتی رہیں سب ہی مگر میں نے صرف
اتنا پوچھا وہ ندی بہتی ہے اب بھی، کہ نہیں
جس سے وابستہ ہیں ہم اور یہ بستی ساری؟
کیوں نہیں بہتی، چنبیلی نے کہا
اور وہ برگد کا گھنا پیڑ کنارے اس کے؟
وہ بھی قائم ہے ابھی تک یونہی
وعدہ کر کے جو حبیبہؔ نہیں آتی تھی کبھی
آنکھیں دھوتا تھا ندی میں جاکر
اور برگد کی گھنی چھاؤں میں سو جاتا تھا
ماہ و سال آتے، چلے جاتے ہیں
فصل پک جاتی ہے، کٹ جاتی ہے
کوئی روتا نہیں اس موقع پر
حلقہ در حلقہ نہ آہن کو تپا کر ڈھالیں
کوئی زنجیر نہ ہو!
زیست در زیست کا یہ سلسلہ باقی نہ رہے!
بھیڑ ہے بچوں کی چھوٹی سی گلی میں دیکھو
ایک نے گیند جو پھینکی تو لگی آ کے مجھے
میں نے جا پکڑا اسے، دیکھی ہوئی صورت تھی
کس کا ہے میں نے کسی سے پوچھا؟
یہ حبیبہ کا ہے، رمضانی قصائی بولا
بھولی صورت پہ ہنسی آ گئی اس کی مجھ کو
وہ بھی ہنسنے لگا، ہم دونوں یونہی ہنستے رہے!
دیر تک ہنستے رہے!
تتلیاں ناچتی ہیں
پھول سے پھول پہ یوں جاتی ہیں
جیسے اک بات ہے جو
کان میں کہنی ہے خاموشی سے
اور ہر پھول ہنسا پڑتا ہے سن کر یہ بات!
Baaz Aamad... Ek Montaj
Titliyan naachti hain
Phool se phool pe yoon jaati hain
Jaise ek baat hai jo
Kaan mein kehni hai khamoshi se
Aur har phool hansa padta hai sun kar yeh baat
Dhoop mein tezi nahin
Aise aata hai har ek jhonka hawa ka jaise
Dast-e-shafqat hai badi umar ki mehbooba ka
Aur mere shanon ko is tarah hila jata hai
Jaise main neend mein hoon
Aurtein charkhe liye baithi hain
Kuch kapas ot'ti hain
Kuch silai ke kisi kaam mein masroof hain yoon
Jaise yeh kaam hai darasal har ek shai ki asas
Ek se ek chehl karti hai
Koi kehti hai meri choodiyan khankein to khankhari meri saas
Koi kehti hai bhari chandni aati nahin raas
Raat ki baat sunati hai koi hans hans kar
Baat ki baat sunati hai koi hans hans kar
Lazzat-e-wasl hai azaar, koi kehti hai
Main to ban jaati hoon beemaar, koi kehti hai
Main bhi ghus aata hoon is sheesh mahal mein dekho
Sab hansi rok ke kehti hain nikalo is ko
Ek parinda kisi ek ped ki tehni pe chehakta hai kahin
Ek gaata hua yoon jata hai dharti se falak ki jaanib
Puri quwwat se koi gend uchhale jaise
Ek phudakta hai sar-e-shakh pe jis tarah koi
Aamad-e-fasl-e-bahari ki khushi mein naache
Goondni bojh se apne hi jhuki padti hai
Nazneen jaise hai koi yeh bhari mehfil mein
Aur kal haath hue hain peele
Koilein kookti hain
Jamnein paki hain, aamon pe bahaar aayi hai
Arghanon bajta hai yakjaai ka
Neem ke pedon mein jhoole hain jidhar dekho udhar
Sawani gaati hain sab ladkiyan awaaz mila kar har soo
Aur is awaaz se goonj uthi hai basti saari
Main kabhi ek kabhi doosre jhoole ke qareen jata hoon
Ek hi kam hai, wahi chehra nahin
Aakhirash pooch hi leta hoon kisi se badh kar
Kyun Habeeba nahin aayi ab tak?
Khilkhila padti hain sab ladkiyan sun kar yeh naam
Lo yeh sapne mein hain, ek kehti hai
Baoli sapna nahin, shahar se aaye hain abhi
Doosri tok'ti hai
Baat se baat nikal chalti hai
Thaat ki aayi thi baraat, Chanbeli ne kaha
Band baja bhi tha, Deepa boli
Aur dulhan pe hua kitna bakher
Kuch na kuch kehti rahin sab hi magar main ne sirf
Itna poocha wo nadi behti hai ab bhi, ke nahin
Jis se wabasta hain hum aur yeh basti saari?
Kyun nahin behti, Chanbeli ne kaha
Aur wo bargad ka ghana ped kinare us ke?
Wo bhi qaem hai abhi tak yunhi
Waada kar ke jo Habeeba —nahin aati thi kabhi
Aankhein dhota tha nadi mein ja kar
Aur bargad ki ghani chhaon mein so jata tha
Mah-o-saal aate, chale jaate hain
Fasl pak jaati hai, kat jaati hai
Koi rota nahin is mauqe par
Halqa dar halqa na aahan ko tapa kar dhaalein
Koi zanjeer na ho!
Zeest dar zeest ka yeh silsila baqi na rahe!
Bheed hai bachon ki chhoti si gali mein dekho
Ek ne gend jo phenki to lagi aa ke mujhe
Main ne ja pakda use, dekhi hui soorat thi
Kis ka hai main ne kisi se poocha?
Yeh Habeeba ka hai, Ramzani Qasai bola
Bholi soorat pe hansi aa gai us ki mujhe
Wo bhi hansne laga, hum donon yunhi hanste rahe!
Der tak hanste rahe!
Titliyan naachti hain
Phool se phool pe yoon jaati hain
Jaise ek baat hai jo
Kaan mein kehni hai khamoshi se
Aur har phool hansa padta hai sun kar yeh baat!
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں