ڈاسنہ اسٹیشن کا مسافر — اخترالایمان
شاعر
ڈاسنہ اسٹیشن کا مسافر
کون سا اسٹیشن ہے؟
ڈاسنہ ہے صاحب جی
آپ کو اترنا ہے؟
''جی نہیں، نہیں،'' لیکن
ڈاسنہ تو تھا ہی وہ
میرے ساتھ قیصر ؔتھی
یہ بڑی بڑی آنکھیں
اک تلاش میں کھوئی
رات بھر نہیں سوئی
جب میں اس کو پہنچانے
اس اجاڑ بستی میں
ساتھ لے کے آیا تھا
میں نے ان سے پھر پوچھا
آپ مستقل شاید
ڈاسنہ میں رہتے ہیں؟
''جی یہاں پہ کچھ میری
سوت کی دکانیں ہیں
کچھ طعام خانے ہیں''
میں سنا کیا بیٹھا
بولتا رہا وہ شخص
''کچھ زمین داری ہے
میرے باپ دادا نے
کچھ مکان چھوڑے تھے
ان کو بیچ کر میں نے
کاروبار کھولا ہے
اس حقیر بستی میں
کون آ کے رہتا تھا
لیکن اب یہی بستی
بمبئی ہے دلی ہے
قیمتیں زمینوں کی
اتنی بڑھ گئیں صاحب
اک زمین ہی کیا ہے
کھانے پینے کی چیزیں
عام جینے کی چیزیں
بھاؤ دس گنے ہیں اب''
بولتا رہا وہ شخص
''اس قدر گرانی ہے
آگ لگ گئی جیسے
آسمان حد ہے بس''
میں نے چونک کر پوچھا
آسماں محل تھا اک
سیدوں کی بستی میں
آسماں نہیں صاحب
اب محل کہاں ہوگا؟
ہنس پڑا یہ کہہ کر وہ
میرے ذہن میں اس کی
بات پے بہ پے گونجی
''اب محل کہاں ہوگا''
اس دیار میں شاید
قیصرؔ اب نہیں رہتی
وہ بڑی بڑی آنکھیں
اب نہ دیکھ پاؤں گا
ملک کا یہ بٹوارا
لے گیا کہاں اس کو
دیوڑھی کا سناٹا
اور ہماری سرگوشی
''مجھ سے کتنے چھوٹے ہو''
میں نے کچھ کہا تھا پھر
اس نے کچھ کہا تھا پھر
ہے رقم کہاں وہ سب
درد کی گراں جانی
میری شعلہ افشانی
اس کی جلوہ سامانی
ہے رقم کہاں وہ اب
کرب زیست سب میرا
گفتگو کا ڈھب میرا
اس کا ہاتھ ہاتھوں میں
لے کے جب میں کہتا تھا
اب چھڑاؤ تو جانوں
رسم بے وفائی کو
آج معتبر مانوں
اس کو لے کے باہوں میں
جھک کے اس کے چہرے پر
بھینچ کر کہا تھا یہ
بولو کیسے نکلو گی
میری دسترس سے تم
میرے اس قفس سے تم
بھورے بادلوں کا دل
دور اڑتا جاتا ہے
پیڑ پر کہیں بیٹھا
اک پرند گاتا ہے
''چل چل'' اک گلہری کی
کان میں کھٹکتی ہے
ریل چلنے لگتی ہے
راہ کے درختوں کی
چھاؤں ڈھلنے لگتی ہے
''مجھ سے کتنے چھوٹے ہو''
اور مری گراں گوشی
دیوڑھی کا سناٹا
اور ہماری سرگوشی
ہے رقم کہاں وہ سب؟
دور اس پرندے نے
اپنا گیت دہرایا
''آج ہم نے اپنا دل
خوں کیا ہوا دیکھا
گم کیا ہوا پایا''
Dasna Station Ka Musafir
Kaun sa station hai?
Dasna hai sahib ji
Aap ko utarna hai?
''Ji nahin, nahin,'' lekin
Dasna to tha hi wo
Mere saath Qaisar —thi
Yeh badi badi aankhein
Ek talaash mein khoi
Raat bhar nahin soi
Jab main is ko pahunchane
Is ujaad basti mein
Saath le ke aaya tha
Main ne un se phir poocha
Aap mustaqil shayad
Dasna mein rehte hain?
''Ji yahan pe kuch meri
Soot ki dukanen hain
Kuch ta'am khane hain''
Main suna kya baitha
Bolta raha wo shakhs
''Kuch zameen dari hai
Mere baap dada ne
Kuch makan chhode the
Un ko bech kar main ne
Karobar khola hai
Is haqeer basti mein
Kaun aa ke rehta tha
Lekin ab yehi basti
Bombay hai, Delhi hai
Qeematein zameeno ki
Itni badh gain sahib
Ek zameen hi kya hai
Khane peene ki cheezein
Aam jeene ki cheezein
Bhao das gune hain ab''
Bolta raha wo shakhs
''Is qadar girani hai
Aag lag gai jaise
Aasman had hai bas''
Main ne chaunk kar poocha
Aasman mahal tha ek
Saiydon ki basti mein
Aasman nahin sahib
Ab mahal kahan hoga?
Hans pada yeh keh kar wo
Mere zehen mein us ki
Baat pe ba pe goonji
''Ab mahal kahan hoga''
Is dayar mein shayad
Qaisar ab nahin rehti
Wo badi badi aankhein
Ab na dekh paunga
Mulq ka yeh batwara
Le gaya kahan is ko
Deodhi ka sannata
Aur hamari sargoshi
''Mujh se kitne chhote ho''
Main ne kuch kaha tha phir
Us ne kuch kaha tha phir
Hai raqam kahan wo sab
Dard ki giran-jaani
Meri shola-afshani
Us ki jalwa-samani
Hai raqam kahan wo ab
Karb-e-zeest sab mera
Guftagu ka dhab mera
Us ka haath hathon mein
Le ke jab main kehta tha
Ab chhurao to jaanoon
Rasm-e-bewafai ko
Aaj moatabar manoon
Is ko le ke bahon mein
Jhuk ke us ke chehre par
Bheench kar kaha tha yeh
Bolo kaise niklo gi
Meri dastaras se tum
Mere is qafas se tum
Bhoore badlon ka dil
Dur udta jata hai
Ped par kahin baitha
Ek parind gata hai
''Chal chal'' ek gilehri ki
Kaan mein khatakti hai
Rail chalne lagti hai
Raah ke darakhton ki
Chhaon dhalne lagti hai
''Mujh se kitne chhote ho''
Aur meri giran-goshi
Deodhi ka sannata
Aur hamari sargoshi
Hai raqam kahan wo sab?
Dur us parinde ne
Apna geet dohraaya
''Aaj hum ne apna dil
Khoon kiya hua dekha
Gum kiya hua paaya''
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں