ایک لڑکا — اخترالایمان
شاعر
ایک لڑکا
دیار شرق کی آبادیوں کے اونچے ٹیلوں پر
کبھی آموں کے باغوں میں کبھی کھیتوں کی مینڈوں پر
کبھی جھیلوں کے پانی میں کبھی بستی کی گلیوں میں
کبھی کچھ نیم عریاں کم سنوں کی رنگ رلیوں میں
سحر دم جھٹپٹے کے وقت راتوں کے اندھیرے میں
کبھی میلوں میں ناٹک ٹولیوں میں ان کے ڈیرے میں
تعاقب میں کبھی گم تتلیوں کے سونی راہوں میں
کبھی ننھے پرندوں کی نہفتہ خواب گاہوں میں
برہنہ پاؤں جلتی ریت یخ بستہ ہواؤں میں
گریزاں بستیوں سے مدرسوں سے خانقاہوں میں
کبھی ہم سن حسینوں میں بہت خوش کام و دل رفتہ
کبھی پیچاں بگولہ ساں کبھی جیوں چشم خوں بستہ
ہوا میں تیرتا خوابوں میں بادل کی طرح اڑتا
پرندوں کی طرح شاخوں میں چھپ کر جھولتا مڑتا
مجھے اک لڑکا آوارہ منش آزاد سیلانی
مجھے اک لڑکا جیسے تند چشموں کا رواں پانی
نظر آتا ہے یوں لگتا ہے جیسے یہ بلائے جاں
مرا ہم زاد ہے ہر گام پر ہر موڑ پر جولاں
اسے ہم راہ پاتا ہوں یہ سائے کی طرح میرا
تعاقب کر رہا ہے جیسے میں مفرور ملزم ہوں
یہ مجھ سے پوچھتا ہے اخترالایمان تم ہی ہو
خدائے عز و جل کی نعمتوں کا معترف ہوں میں
مجھے اقرار ہے اس نے زمیں کو ایسے پھیلایا
کہ جیسے بستر کم خواب ہو دیبا و مخمل ہو
مجھے اقرار ہے یہ خیمۂ افلاک کا سایہ
اسی کی بخششیں ہیں اس نے سورج چاند تاروں کو
فضاؤں میں سنوارا اک حد فاصل مقرر کی
چٹانیں چیر کر دریا نکالے خاک اسفل سے
مری تخلیق کی مجھ کو جہاں کی پاسبانی دی
سمندر موتیوں مونگوں سے کانیں لعل و گوہر سے
ہوائیں مست کن خوشبوؤں سے معمور کر دی ہیں
وہ حاکم قادر مطلق ہے یکتا اور دانا ہے
اندھیرے کو اجالے سے جدا کرتا ہے خود کو میں
اگر پہچانتا ہوں اس کی رحمت اور سخاوت ہے
اسی نے خسروی دی ہے لئیموں کو مجھے نکبت
اسی نے یاوہ گویوں کو مرا خازن بنایا ہے
تونگر ہرزہ کاروں کو کیا دریوزہ گر مجھ کو
مگر جب جب کسی کے سامنے دامن پسارا ہے
یہ لڑکا پوچھتا ہے اخترالایمان تم ہی ہو
معیشت دوسروں کے ہاتھ میں ہے میرے قبضہ میں
جز اک ذہن رسا کچھ بھی نہیں پھر بھی مگر مجھ کو
خروش عمر کے اتمام تک اک بار اٹھانا ہے
عناصر منتشر ہو جانے نبضیں ڈوب جانے تک
نوائے صبح ہو یا نالۂ شب کچھ بھی گانا ہے
ظفر مندوں کے آگے رزق کی تحصیل کی خاطر
کبھی اپنا ہی نغمہ ان کا کہہ کر مسکرانا ہے
وہ خامہ سوزی شب بیداریوں کا جو نتیجہ ہو
اسے اک کھوٹے سکے کی طرح سب کو دکھانا ہے
کبھی جب سوچتا ہوں اپنے بارے میں تو کہتا ہوں
کہ تو اک آبلہ ہے جس کو آخر پھوٹ جانا ہے
غرض گرداں ہوں باد صبح گاہی کی طرح لیکن
سحر کی آرزو میں شب کا دامن تھامتا ہوں جب
یہ لڑکا پوچھتا ہے اخترالایمان تم ہی ہو
یہ لڑکا پوچھتا ہے جب تو میں جھلا کے کہتا ہوں
وہ آشفتہ مزاج اندوہ پرور اضطراب آسا
جسے تم پوچھتے رہتے ہو کب کا مر چکا ظالم
اسے خود اپنے ہاتھوں سے کفن دے کر فریبوں کا
اسی کی آرزوؤں کی لحد میں پھینک آیا ہوں
میں اس لڑکے سے کہتا ہوں وہ شعلہ مر چکا جس نے
کبھی چاہا تھا اک خاشاک عالم پھونک ڈالے گا
یہ لڑکا مسکراتا ہے یہ آہستہ سے کہتا ہے
یہ کذب و افترا ہے جھوٹ ہے دیکھو میں زندہ ہوں
Ek Ladka
Diyar-e-sharq ki aabadiyon ke oonche teelon par
Kabhi aamon ke baghon mein kabhi kheton ki mendon par
Kabhi jheelon ke pani mein kabhi basti ki galiyon mein
Kabhi kuchh neem-uryan kam-sinon ki rang-raliyon mein
Sahar dam jhat-pate ke waqt raaton ke andhere mein
Kabhi meelon mein natak toliyon mein un ke dere mein
Ta'aqub mein kabhi gum titliyon ke sooni raahon mein
Kabhi nanhe parindon ki nafta khwab-gahon mein
Barahna paon jalti ret yakh-basta hawaon mein
Gurezaan bastiyon se madarson se khanaqahon mein
Kabhi hum-sin haseenon mein bahut khush kam-o-dil rafta
Kabhi pechaan bagoola saan kabhi jyon chashm-e-khoon basta
Hawa mein tairta khwabon mein badal ki tarah udta
Parindon ki tarah shakhoon mein chhup kar jhoolta mudta
Mujhe ik ladka aawara-manish aazad sailani
Mujhe ik ladka jaise tund chashmon ka rawaan pani
Nazar aata hai yun lagta hai jaise yeh bala-e-jaan
Mera hum-zad hai har gaam par har mod par jawalan
Use hum-rah pata hoon yeh saaye ki tarah mera
Ta'aqub kar raha hai jaise main mafroor mulzim hoon
Yeh mujh se poochhta hai Akhtara-al-Iman tum hi ho
Khuda-e-'azz-o-jall ki ne'maton ka mu'tarif hoon main
Mujhe iqrar hai us ne zameen ko aise phailaya
Ke jaise bistar kam-khwab ho deeba-o-makhmal ho
Mujhe iqrar hai yeh khema-e-aflak ka saaya
Isi ki bakhshishen hain us ne suraj chand taaron ko
Fazaon mein sanwara ik had-e-fasal muqarrar ki
Chattanen cheer kar darya nikale khak-e-asfal se
Meri takhleeq ki mujh ko jahan ki pasbani di
Samandar motiyon mungon se kaniyaan la'l-o-gauhar se
Hawaen mast-kun khushbuon se ma'moor kar di hain
Woh hakim-e-qadir-e-mutlaq hai yakta aur dana hai
Andhere ko ujale se juda karta hai khud ko main
Agar pehchanta hoon us ki rahmat aur sakhawat hai
Isi ne khusravi di hai laeemon ko mujhe nikbat
Isi ne yawagoiyon ko mera khazin banaya hai
Taawangar harza-karon ko kiya derweza gar mujh ko
Magar jab jab kisi ke samne daman pasara hai
Yeh ladka poochhta hai Akhtara-al-Iman tum hi ho
Ma'eeshat doosron ke haath mein hai mere qabze mein
Juz ik zehn-e-rasa kuchh bhi nahin phir bhi magar mujh ko
Khurosh-e-'umr ke itmam tak ik bar uthana hai
Anasir muntashir ho jaane nabzen doob jaane tak
Nawa-e-subh ho ya nala-e-shab kuchh bhi gaana hai
Zafar-mandon ke aage rizq ki tehseel ki khatir
Kabhi apna hi naghma un ka keh kar muskuraana hai
Woh khama-sozi shab bedariyon ka jo nateeja ho
Use ik khote sikke ki tarah sab ko dikhaana hai
Kabhi jab sochta hoon apne bare mein to kehta hoon
Ke tu ik aabla hai jis ko aakhir phoot jaana hai
Garz gardaan hoon bad-e-subh-gahi ki tarah lekin
Sahar ki aarzoo mein shab ka daman thaamta hoon jab
Yeh ladka poochhta hai Akhtara-al-Iman tum hi ho
Yeh ladka poochhta hai jab to main jhalla ke kehta hoon
Woh aashufta-mizaj andooh-parwar iztirab-aasa
Jise tum poochhte rehte ho kab ka mar chuka zaalim
Use khud apne haathon se kafan de kar farebon ka
Isi ki aarzuon ki lahad mein phenk aaya hoon
Main is ladke se kehta hoon woh shola mar chuka jis ne
Kabhi chaha tha ik khashak-e-alam phoong daale ga
Yeh ladka muskurata hai yeh aahista se kehta hai
Yeh kizb-o-iftira hai jhoot hai dekho main zinda hoon
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں