فیصلہ — اخترالایمان
شاعر
فیصلہ
آج سوچا ہے کہ احساس کو زائل کر دوں
اپنے شوریدہ ارادے کو اپاہج کر لوں
اپنی مجروح تمنا کا مداوا نہ کروں
اپنی خوابیدہ محبت کا المناک مآل
اپنی بے خواب جوانی کو سنایا نہ کروں
اپنے بے کیف تصور کے سہارے کے لیے
ایک بھی شمع سر راہ جلایا نہ کروں
اپنے بے سود تخیل کو بھٹک جانے دوں
زندگی جیسے گزرتی ہے گزر جانے دوں
چند لمحوں میں گزرنے کو ہے ہنگامۂ شب
سو گئے جام صراحی کا سہارا لے کر
سرد پڑنے لگا اجڑی ہوئی محفل کا گداز
تھک گئی گردش یک رنگ سے ساقی کی نظر
چند بیدار فسانوں کا اثر لوٹ گیا
دب گیا تلخ حقیقت میں نشہ تا بہ کمر
میں ابھی آخری مے نوش ہوں میخانے میں
دیکھنا کیا ہے مری سمت بڑھا جام بڑھا
لا صراحی کو مرے پاس شکستہ ہی سہی
چھیڑ ٹوٹے ہوئے تاروں کو کراہیں تو ذرا
سوچتا کیا ہے انڈیل اور انڈیل اور انڈیل
سرد پڑتی ہوئی محفل کے مکدر پہ نہ جا
اپنے بیدار تفکر کی ہلاکت پہ ہنسوں
آج سوچا ہے کہ احساس کو زائل کر دوں
Faisla
Aaj socha hai ke ehsaas ko zaail kar doon
Apne shoorida iraade ko apaahaj kar loon
Apni majrooh tamanna ka mudaawa na karoon
Apni khwaabeeda mohabbat ka almanaak ma'aal
Apni be-khwab jawani ko sunaya na karoon
Apne be-kaif tasawwur ke sahaare ke liye
Ek bhi shama sar-e-raah jalaya na karoon
Apne be-sood takhayyul ko bhatak jaane doon
Zindagi jaise guzarti hai guzar jaane doon
Chand lamhon mein guzarne ko hai hangama-e-shab
So gaye jaam surahi ka sahaara le kar
Sard padne laga ujdi hui mehfil ka gudaz
Thak gayi gardish-e-yak-rang se saaqi ki nazar
Chand bedaar fasanon ka asar loot gaya
Dab gaya talkh haqeeqat mein nasha ta ba kamar
Main abhi aakhiri mai-nosh hoon maikhane mein
Dekhna kya hai meri simt badha jaam badha
La surahi ko mere paas shikasta hi sahi
Chhed toote hue taaron ko karaahen toh zara
Sochta kya hai, undel aur undel aur undel
Sard padti hui mehfil ke mukaddar pe na ja
Apne bedaar tafakkur ki halakat pe hansoon
Aaj socha hai ke ehsaas ko zaail kar doon
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں