کارنامہ — اخترالایمان
شاعر
کارنامہ
عظیم کام کروں کوئی ایک دن سوچا
کہ رہتی دنیا میں اپنا بھی نام رہ جائے
مگر وہ کام ہو کیا ذہن میں نہیں آیا
پیمبری تو زیاں جان کا ہے دعویٰ کیا
تو جانے سولی پہ چڑھنا ہو یا چلیں آرے
کہ زندہ آگ کی لپٹوں کی نذر ہونا پڑے
خیال آیا فنون لطیفہ ڈھیروں ہیں
صنم تراشی ہے نغمہ گری کہ نقاشی
یہ سب ہی دائمی شہرت کا اک وسیلہ ہیں
مگر نہ لفظوں پہ قدرت نہ رنگ قابو میں
پھر اک ذریعہ سیاست ہے نام پانے کا
علاوہ نام کے مہرے بنا کے لوگوں کو
بساط ارض پہ شطرنج کھیل سکتے ہیں
مگر یہ فن بھی مری دسترس سے باہر تھا
پھر اور کیا ہو بہت کچھ خیال دوڑایا
علاوہ ان کے مجھے اور کچھ نہیں سوجھا
زمانے بعد سمندر کنارے بیٹھا تھا
عظیم شے ہے سمندر بھی میرے دل نے کہا
وہ کیا طریقہ ہو میں اس کا بھاگ بن جاؤں
سمجھ میں آیا نہیں کوئی راستہ بھی جب
تو جھنجھلا کے سمندر میں کر دیا پیشاب
Kaarnaama
Azeem kaam karoon koi ek din socha
Ke rehti duniya mein apna bhi naam rah jaaye
Magar woh kaam ho kya zehan mein nahin aaya
Paighambari to ziyaan-e-jaan ka hai, da'wa kya
To jaane sooli pe chadhna ho ya chalein aare
Ke zinda aag ki lapton ki nazar hona pade
Khayal aaya funoon-e-lateefa dheron hain
Sanam-taraashi hai, naghma-gari ke naqqashi
Ye sab hi daaymi shohrat ka ik waseela hain
Magar na lafzon pe qudrat na rang qaaboo mein
Phir ik zariya siyasat hai naam paane ka
Alaawa naam ke mohre bana ke logon ko
Basaat-e-arz pe shatranj khel sakte hain
Magar ye fan bhi meri dastaras se bahar tha
Phir aur kya ho bahut kuch khayal daudaya
Alaawa in ke mujhe aur kuch nahin soojha
Zamaane baad samandar kinare baitha tha
Azeem shai hai samandar bhi mere dil ne kaha
Woh kya tareeqa ho main is ka bhaag ban jaaun
Samajh mein aaya nahin koi raasta bhi jab
To jhinjhalakar samandar mein kar diya peshaab
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں