مفاہمت — اخترالایمان
شاعر
مفاہمت
جب اس کا بوسہ لیتا تھا سگریٹ کی بو نتھنوں میں گھس جاتی تھی
میں تمباکو نوشی کو اک عیب سمجھتا آیا ہوں
لیکن اب میں عادی ہوں، یہ میری ذات کا حصہ ہے
وہ بھی میرے دانتوں کی بد رنگی سے مانوس ہے، ان کی عادی ہے
جب ہم دونوں ملتے ہیں، لفظوں سے بیگانہ سے ہو جاتے ہیں
کمرے میں کچھ سانسیں اور پسینے کی بو، تنہائی رہ جاتی ہے!
ہم دونوں شاید مردہ ہیں احساس کا چشمہ سوکھا ہے
یا پھر شاید ایسا ہے یہ افسانہ بوسیدہ ہے
درد زہ سے زیست یونہی ہلکان تڑپتی رہتی ہے
نئے مسیحا آتے ہیں اور سولی پر چڑھ جاتے ہیں
اک مٹیالا انسان صفوں کو چیر کے آگے بڑھتا ہے اور منبر سے چلاتا ہے
ہم مصلوب کے وارث ہیں یہ خون ہمارا ورثہ ہے
اور وہ سب آدرش، وہ سب جو وجہ ملامت ٹھہرا تھا
اس مٹیالے شخص کے گہرے معدے میں کھپ جاتا ہے
پھر تفسیروں اور تاویلوں کی شکل میں باہر آتا ہے
یہ تاویلیں مجبوروں کا اک موہوم سہارا ہیں
یا شاید سب کا سہارا ہیں
یونہی میں آدرش انسان کا جویا ہوں
سب ہی سپنے دیکھتے ہیں خوابوں میں ہوا میں اڑتے ہیں
پھر اک منزل آتی ہے جب پھوٹ پھوٹ کر روتے ہیں
شاخوں کی طرح ٹوٹتے ہیں
اک روح جان و دل کو جو دنیا میں سب سے بڑھ کر ہے پا لیتے ہیں
پھر اس سے نفرت کرتے ہیں گو پھر بھی محبت کرتے ہیں!
میں اس سے نفرت کرتا ہوں وہ مجھ کو نیچ سمجھتی ہے
لیکن جب ہم ملتے ہیں تنہائی میں تاریکی میں
دونوں ایسے ہو جاتے ہیں جیسے آغشتہ مٹی ہیں
نفرت ضم ہو جاتی ہے اک سناٹا رہ جاتا ہے
سناٹا تخلیق زمیں کے بعد جو ہر سو طاری تھا
ہم دونوں ٹوٹتے رہتے ہیں جیسے ہم کچی شاخیں ہیں
خوابوں کا ذکر نہیں کرتے دونوں نے کبھی جو دیکھتے تھے
خوشیوں کا ذکر نہیں کرتے جو کب کی سپرد خاک ہوئیں
بس دونوں ٹوٹتے رہتے ہیں
میں بادہ نوشی پر مائل ہوں، وہ سگریٹ پیتی رہتی ہے
اک سناٹے کی چادر میں ہم دونوں لپٹے جاتے ہیں
ہم دونوں ٹوٹتے رہتے ہیں جیسے ہم کچی شاخیں ہیں!
Mufahamat
Jab us ka bosa leta tha cigarette ki boo nathnon mein ghus jaati thi
Main tambaaku noshi ko ek aib samajhta aaya hoon
Lekin ab main aadi hoon, yeh meri zaat ka hissa hai
Woh bhi mere daanton ki bad-rangi se maanoos hai, un ki aadi hai
Jab hum dono milte hain, lafzon se begaana se ho jaate hain
Kamre mein kuch saansein aur paseene ki boo, tanhai reh jaati hai!
Hum dono shayad murda hain ehsaas ka chashma sookha hai
Ya phir shayad aisa hai yeh afsana boseeda hai
Dard-e-zeh se zeest yoonhi halkaan tadapti rehti hai
Naye Maseeha aate hain aur sooli par chadh jaate hain
Ik mitti-ala insaan saffon ko cheer ke aage badhta hai aur mimbar se chalaata hai
Hum masloob ke waris hain yeh khoon hamara virsa hai
Aur woh sab aadarsh, woh sab jo wajah-e-malamat thehra tha
Us mitti-ale shakhs ke gehre maide mein khap jaata hai
Phir tafseeron aur taaweelon ki shakal mein bahar aata hai
Yeh taaweelien majbooron ka ek mauhoom sahara hain
Ya shayad sab ka sahara hain
Yoonhi main aadarsh insaan ka joya hoon
Sab hi sapne dekhte hain khwabon mein hawa mein udte hain
Phir ek manzil aati hai jab phoot phoot kar rote hain
Shakhon ki tarah toot-te hain
Ek rooh jaan-o-dil ko jo duniya mein sab se badh kar hai paa lete hain
Phir us se nafrat karte hain go phir bhi mohabbat karte hain!
Main us se nafrat karta hoon woh mujh ko neech samajhti hai
Lekin jab hum milte hain tanhai mein tareeki mein
Dono aise ho jaate hain jaise aaghushta mitti hain
Nafrat zam ho jaati hai ek sannata reh jaata hai
Sannata takhleeq-e-zameen ke baad jo har soo taari tha
Hum dono toot-te rehte hain jaise hum kachi shakhein hain
Khwabon ka zikr nahin karte dono ne kabhi jo dekhte thay
Khushiyon ka zikr nahin karte jo kab ki supard-e-khaak huien
Bas dono toot-te rehte hain
Main baada noshi par maayil hoon, woh cigarette peeti rehti hai
Ek sannate ki chadar mein hum dono lipte jaate hain
Hum dono toot-te rehte hain jaise hum kachi shakhein hain!
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں