سبزۂ بیگانہ — اخترالایمان
شاعر
سبزۂ بیگانہ
حسب نسب ہے نہ تاریخ و جائے پیدائش
کہاں سے آیا تھا مذہب نہ ولدیت معلوم
مقامی چھوٹے سے خیراتی اسپتال میں وہ
کہیں سے لایا گیا تھا وہاں یہ ہے مرقوم
مریض راتوں کو چلاتا ہے ''مرے اندر
اسیر زخمی پرندہ ہے اک، نکالو اسے
گلو گرفتہ ہے یہ حبس دم ہے خائف ہے
ستم رسیدہ ہے مظلوم ہے بچا لو اسے''
مریض چیختا ہے درد سے کراہتا ہے
یہ وتنام، کبھی ڈومنیکن، کبھی کشمیر
زر کثیر، سیہ قومیں، خام معدنیات
کثیف تیل کے چشمے، عوام، استحصال
زمیں کی موت بہائم، فضائی جنگ، ستم
اجارہ داری، سبک گام، دل ربا، اطفال
سرود و نغمہ، ادب، شعر، امن، بربادی
جنازہ عشق کا، دف کی صدائیں، مردہ خیال
ترقی، علم کے گہوارے، روح کا مدفن
خدا کا قتل، عیاں زیر ناف زہرہ جمال
تمام رات یہ بے ربط باتیں کرتا ہے
مریض سخت پریشانی کا سبب ہے یہاں
غرض کہ جو تھا شکایت کا ایک دفتر تھا
نتیجہ یہ ہے اسی روز منتقل کرکے
اسے اک اور شفا خانے کو روانہ کیا
سنا گیا ہے وہاں نفسیات کے ماہر
طبیب حاذق و نباض ڈاکٹر کتنے
طلب کیے گئے اور سب نے اتفاق کیا
یہ کوئی ذہنی مرض ہے، مریض نے شاید
کبھی پرندہ کوئی پالا ہوگا لیکن وہ
عدم توجہی یا اتفاق سے یونہی
بچارہ مر گیا اس موت کا اثر ہے یہ
عجیب چیز ہے تحت شعور انساں کا
یہ اور کچھ نہیں احساس جرم ہے جس نے
دل و دماغ پہ قبضہ کیا ہے اس درجہ
مریض قاتل و مجرم سمجھتا ہے خود کو!
کسی کی رائے تھی پسماندہ قوم کا اک فرد
مریض ہوگا اسی واسطے سیہ قومیں
غریب کے لیے اک ٹیبو بن گئیں افسوس
کوئی یہ کہتا تھا یہ اصل میں ہے حب وطن
مریض چاہتا تھا ہم کفیل ہوں اپنے
کسی بھی قوم کے آگے نہ ہاتھ پھیلائیں
یہیں پہ تیل کے چشمے ہیں، وہ کریں دریافت!
گمان کچھ کو تھا یہ شخص کوئی شاعر ہے
جو چاہتا تھا جہاں گردی میں گزارے وقت
حسین عورتیں مائل ہوں لطف و عیش رہے
قلم کے زور سے شہرت ملے زمانے میں
زر کثیر بھی ہاتھ آئے اس بہانے سے
مگر غریب کی سب کوششیں گئیں ناکام
شکست پیہم و احساس نارسائی نے
یہ حال کر دیا مجروح ہوگئے اعصاب
غرض کہ نکتہ رسی میں گزر گیا سب وقت
وہ چیختا ہی رہا درد کی دوا نہ ملی
نشست بعد نشست اور معائنے شب و روز
انہیں میں وقت گزرتا گیا شفا نہ ملی
پھر ایک شام وہاں سرمہ در گلو آئی
جو اس کے واسطے گویا طبیب حاذق تھی
کسی نے پھر نہ سنی درد سے بھری آواز
کراہتا تھا جو خاموش ہو گیا وہ ساز
برس گزر گئے اس واقعہ کو، ماضی کی
اندھیری گود نے کب کا چھپا لیا اس کو
مگر سنا ہے شفا خانے کے در و دیوار
وہ گرد و پیش جہاں سے کبھی وہ گزرا تھا
خرابے بستیاں جنگل، اجاڑ راہ گزار
اسی کی چیخ کو دہرائے جا رہے ہیں ابھی
''کوئی مداوا کرو ظالمو مرے اندر
اسیر زخمی پرندہ ہے اک نکالو اسے
گلو گرفتہ ہے یہ حبس دم ہے خائف ہے
ستم رسیدہ ہے مظلوم ہے بچا لو اسے''
Sabza Baigaana
Hasb nasb hai na tareekh-o-jaaye-paidaaish
Kahan se aaya tha mazhab na waladiyat maloom
Muqaami chhote se khairati aspatal mein woh
Kahin se laaya gaya tha wahan yeh hai marqoom
Mareez raaton ko chillaata hai ''mere andar
Aseer zakhmi parinda hai ek, nikaalo use
Galu-girifta hai yeh habs-e-dam hai khaif hai
Sitam-raseeda hai mazloom hai bacha lo use''
Mareez cheekhta hai dard se karahata hai
Yeh Vietnam, kabhi Dominican, kabhi Kashmir
Zar-e-kaseer, siyah qaumen, khaam maadaniyaat
Kaseef teil ke chashme, awaam, istehsaal
Zameen ki maut bahaayem, fazai jang, sitam
Ijaara-daari, subuk-gaam, dilruba, atfaal
Surood-o-naghma, adab, sher, amn, barbaadi
Janaza-e-ishq ka, daf ki sadaayen, murda khayal
Taraqqi, ilm ke gehwaare, rooh ka madfan
Khuda ka qatl, ayaan zer-e-naaf-e-zuhra jamaal
Tamaam raat yeh be-rabt baatein karta hai
Mareez sakht pareshani ka sabab hai yahan
Gharaz ke jo tha shikayat ka ek daftar tha
Nateeja yeh hai isi roz muntaqil karke
Use ek aur shifa-khane ko rawana kiya
Suna gaya hai wahan nafsiyaat ke maahir
Tabeeb-e-haaziq-o-nabbaaz doctor kitne
Talab kiye gaye aur sab ne ittifaq kiya
Yeh koi zehni marz hai, mareez ne shayad
Kabhi parinda koi paala hoga lekin woh
Adam-tawajjohi ya ittifaq se yoonhi
Bichaara mar gaya is maut ka asar hai yeh
Ajeeb cheez hai tahet-e-shaoor insaan ka
Yeh aur kuch nahin ehsaas-e-jurm hai jis ne
Dil-o-dimaagh pe qabza kiya hai is darja
Mareez qaatil-o-mujrim samajhta hai khud ko!
Kisi ki raaye thi pasmanda qaum ka ek fard
Mareez hoga isi vaaste siyah qaumen
Ghareeb ke liye ek taboo ban gayin afsos
Koi yeh kehta tha yeh asal mein hai hubb-e-watan
Mareez chahta tha hum kafeel hon apne
Kisi bhi qaum ke aage na haath phelaayen
Yahin pe teil ke chashme hain, woh karen daryaaft!
Gumaan kuch ko tha yeh shakhs koi shair hai
Jo chahta tha jahan-gardi mein guzaare waqt
Haseen auratein maayil hon lutf-o-aish rahe
Qalam ke zor se shohrat mile zamane mein
Zar-e-kaseer bhi haath aaye is bahane se
Magar ghareeb ki sab koshishen gayin nakaam
Shikast-e-paiham-o-ehsaas-e-naa-rasaayi ne
Yeh haal kar diya majrooh ho gaye asaab
Gharaz ke nukta-rasi mein guzar gaya sab waqt
Woh cheekhta hi raha dard ki dawa na mili
Nishast baad nishast aur muayene shab-o-roz
Inhein mein waqt guzarta gaya shifa na mili
Phir ek shaam wahan surma dar-gulu aayi
Jo us ke vaaste goya tabeeb-e-haaziq thi
Kisi ne phir na suni dard se bhari aawaz
Karahata tha jo khamosh ho gaya woh saaz
Baras guzar gaye is waaqiye ko, maazi ki
Andheri god ne kab ka chhupa liya is ko
Magar suna hai shifa-khane ke dar-o-diwaar
Woh gird-o-pesh jahan se kabhi woh guzra tha
Kharabe bastiyan jungle, ujaad raah-guzar
Isi ki cheekh ko duhraaye ja rahe hain abhi
''Koi mudaawa karo zaalimo mere andar
Aseer zakhmi parinda hai ek nikaalo use
Galu-girifta hai yeh habs-e-dam hai khaif hai
Sitam-raseeda hai mazloom hai bacha lo use''
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں