تنہائی میں — اخترالایمان
شاعر
تنہائی میں
میرے شانوں پہ ترا سر تھا نگاہیں نمناک
اب تو اک یاد سی باقی ہے سو وہ بھی کیا ہے
گھر گیا ذہن غم زیست کے اندازوں میں
ہر ہتھیلی پہ دھرے سوچ رہا ہوں بیٹھا
کاش اس وقت کوئی پیر خمیدہ آ کر
کسی آزردہ طبیعت کا فسانہ کہتا
اک دھندلکا سا ہے دم توڑ چکا ہے سورج
دن کے دامن پہ ہیں دھبے سے ریا کاری کے
اور مغرب کی فنا گاہ میں پھیلا ہوا خوں
دبتا جاتا ہے سیاہی کی تہوں کے نیچے
دور تالاب کے نزدیک وہ سوکھی سی ببول
چند ٹوٹے ہوئے ویران مکانوں سے پرے
ہاتھ پھیلائے برہنہ سی کھڑی ہے خاموش
جیسے غربت میں مسافر کو سہارا نہ ملے
اس کے پیچھے سے جھجکتا ہوا اک گول سا چاند
ابھرا بے نور شعاعوں کے سفینہ کو لیے
میں ابھی سوچ رہا ہوں کہ اگر تو مل جائے
زندگی گو ہے گراں بار پہ اتنی نہ رہے
چند آنسو غم گیتی کے لیے چند نفس
ایک گھاؤ ہے جسے یوں ہی سیے جاتے ہیں
میں اگر جی بھی رہا ہوں تو تعجب کیا ہے
مجھ سے لاکھوں ہیں جو بے سود جیے جاتے ہیں
کوئی مرکز ہی نہیں میرے تخیل کے لیے
اس سے کیا فائدہ جیتے رہے اور جی نہ سکے
اب ارادہ ہے کہ پتھر کے صنم پوجوں گا
تاکہ گھبراؤں تو ٹکرا بھی سکوں مر بھی سکوں
ایسے انسانوں سے پتھر کے صنم اچھے ہیں
ان کے قدموں پہ مچلتا ہو دمکتا ہوا خوں
اور وہ میری محبت پہ کبھی ہنس نہ سکیں
میں بھی بے رنگ نگاہوں کی شکایت نہ کروں
یا کہیں گوشۂ اہرام کے سناٹے میں
جا کے خوابیدہ فراعین سے اتنا پوچھوں
ہر زمانے میں کئی تھے کہ خدا ایک ہی تھا
اب تو اتنے ہیں کہ حیران ہوں کس کو پوجوں
اب تو مغرب کی فنا گاہ میں وہ سوگ نہیں
عکس تحریر ہے اک رات کا ہلکا ہلکا
اور پر سوز دھندلکے سے وہی گول سا چاند
اپنی بے نور شعاعوں کا سفینہ کھیتا
ابھرا نمناک نگاہوں سے مجھے تکتا ہوا
جیسے گھل کر مرے آنسو میں بدل جائے گا
ہاتھ پھیلائے ادھر دیکھ رہی ہے وہ ببول
سوچتی ہوگی کوئی مجھ سا ہے یہ بھی تنہا
آئینہ بن کے شب و روز تکا کرتا ہے
کیسا تالاب ہے جو اس کو ہرا کر نہ سکا
یوں گزارے سے گزر جائیں گے دن اپنے بھی
پر یہ حسرت ہی رہے گی کہ گزارے نہ گئے
خون پی پی کے پلا کرتی ہے انگور کی بیل
گر یہی رنگ تمنا تھا چلو یوں ہی سہی
خون پیتی رہی بڑھتی رہی کونپل کونپل
چھاؤں تاروں کی شگوفوں کو نمو دیتی رہی
نرم شاخوں کو تھپکتے رہے ایام کے ہاتھ
یوں ہی دن بیت گئے صبح ہوئی شام ہوئی
اب مگر یاد نہیں کیا تھا مآل امید
ایک تحریر ہے ہلکی سی لہو کی باقی
بیل پھلتی ہے تو کانٹوں کو چھپا لیتی ہے
زندگی اپنی پریشاں تھی پریشاں ہی رہی
چاہتا یہ تھا مرے زخم کے انگور بندھیں
یہ نہ چاہا تھا مرا جام تہی رہ جائے
ہاتھ پھیلائے ادھر دیکھ رہی ہے وہ ببول
سوچتی ہوگی کوئی مجھ سا ہے یہ بھی تنہا
گھر گیا ذہن غم زیست کے اندازوں میں
کیسا تالاب ہے جو اس کو ہرا کر نہ سکا
کاش اس وقت کوئی پیر خمیدہ آ کر
میرے شانوں کو تھپکتا غم تنہائی میں
Tanhai Mein
Mere shanon pe tera sar tha nigahein namnak
Ab to ek yaad si baqi hai so wo bhi kya hai
Ghar gaya zehen gham-e-zeest ke andaazon mein
Har hatheli pe dhare soch raha hoon baitha
Kaash is waqt koi peer-e-khameeda aa kar
Kisi aazurda tabiyat ka fasana kehta
Ek dhundalka sa hai dam tod chuka hai Sooraj
Din ke daaman pe hain dhabbe se riyakari ke
Aur maghrib ki fana-gah mein phaila hua khoon
Dabta jata hai siyahi ki tahon ke neeche
Dur talaab ke nazdeek wo sookhi si babool
Chand toote hue veeran makanon se pare
Haath phailaaye barehna si khadi hai khamosh
Jaise ghurbat mein musafir ko sahara na mile
Is ke peeche se jhijhakta hua ek gol sa chand
Abhra be-noor shuaon ke safeena ko liye
Main abhi soch raha hoon ke agar tu mil jaaye
Zindagi go hai giran-baar pe itni na rahe
Chand aansoo gham-e-geeti ke liye chand nafas
Ek ghao hai jise yoon hi siye jaate hain
Main agar ji bhi raha hoon to ta'ajjub kya hai
Mujh se lakhon hain jo be-sood jiye jaate hain
Koi markaz hi nahin mere takhayyul ke liye
Is se kya faeda jeete rahe aur ji na sake
Ab irada hai ke patthar ke sanam poojunga
Taake ghabraoon to takra bhi sakoon mar bhi sakoon
Aise insaanon se patthar ke sanam achhe hain
Un ke qadmon pe machalta ho damakta hua khoon
Aur wo meri mohabbat pe kabhi hans na sakein
Main bhi be-rang nigahon ki shikayat na karoon
Ya kahin gosha-e-ahraam ke sannate mein
Ja ke khwabida faraeen se itna poochoon
Har zamane mein kai the ke khuda ek hi tha
Ab to itne hi hain ke hairan hoon kis ko poojoon
Ab to maghrib ki fana-gah mein wo sog nahin
Aks-e-tehreer hai ek raat ka halka halka
Aur pur-soz dhundalke se wahi gol sa chand
Apni be-noor shuaon ka safeena kheechta
Abhra namnak nigahon se mujhe takta hua
Jaise ghul kar mere aansoo mein badal jaaye ga
Haath phailaaye udhar dekh rahi hai wo babool
Sochti hogi koi mujh sa hai yeh bhi tanha
Aaina ban ke shab-o-roz taka karta hai
Kaisa talaab hai jo is ko hara kar na saka
Yoon guzaare se guzar jaayenge din apne bhi
Par yeh hasrat hi rahe gi ke guzaare na gaye
Khoon pee pee ke pila karti hai angoor ki bel
Gar yehi rang-e-tamanna tha chalo yoon hi sahi
Khoon peeti rahi badhti rahi konpal konpal
Chhaon taaron ki shagoofon ko namu deti rahi
Narm shakhon ko thapakte rahe ayyam ke haath
Yoon hi din beet gaye subh hui sham hui
Ab magar yaad nahin kya tha maal-e-ummeed
Ek tehreer hai halki si lahu ki baqi
Bel phalti hai to kaanton ko chhupa leti hai
Zindagi apni pareshan thi pareshan hi rahi
Chahta yeh tha mere zakhm ke angoor bandhein
Yeh na chaha tha mera jaam-e-tahi reh jaaye
Haath phailaaye udhar dekh rahi hai wo babool
Sochti hogi koi mujh sa hai yeh bhi tanha
Ghar gaya zehen gham-e-zeest ke andaazon mein
Kaisa talaab hai jo is ko hara kar na saka
Kaash is waqt koi peer-e-khameeda aa kar
Mere shanon ko thapakta gham-e-tanhai mein
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں