ترغیب اور اس کے بعد — اخترالایمان
شاعر
ترغیب اور اس کے بعد
ترغیب:
پھر میں کام میں لگ جاؤں گا آ فرصت ہے پیار کریں
ناگن سی بل کھاتی اٹھ اور میری گود میں آن مچل
بھید بھاؤ کی بستی میں کوئی بھید بھاؤ کا نام نہ لے
ہستی پر یوں چھا جا بڑھ کر شرمندہ ہو جائے اجل
چھوڑ یہ لاج کا گھونگٹ کب تک رہے گا ان آنکھوں کے ساتھ
چڑھتی رات ہے ڈھلتا سورج کھڑی کھڑی مت پاؤں مل
پھر یہ جادو سو جائے گا سمے جو بیتا گہری نیند
جو کچھ ہے انمول ہے اب تک ایک اک لمحہ ایک اک پل
بن چھوئی مٹی کی خوشبو اس کا سوندھا سوندھا پن
سب کچھ چھن جائے گا اک دن اب بھی وقت ہے دیکھ سنبھل
نرم رگوں میں میٹھی میٹھی ٹیس جو یہ اٹھتی ہے آج
بڑھتی موج کا ریلا ہے اک، ٹیس نہ اٹھے گی کل
مست رسیلی آنکھوں سے یہ چھلکی چھلکی سی اک شے
جس نے آج اپنایا اس کو سمجھو اس کے کار سپھل
میں تیرے شعلوں سے کھیلوں تو بھی میری آگ سے کھیل
میں بھی تیری نیند چراؤں تو بھی میری نیندیں چھل
نرم ہوا کے جھونکوں ہی سے کھلتی ہے پھولوں کی آنکھ
ورنہ برسوں ساتھ رہے ہیں ٹھہرا پانی بند کنول!
اس کے بعد:
بھیگی رات کا نشہ ٹوٹا ڈوب گیا ہے چڑھتا چاند
تھکے تھکے ہیں اعضا سارے اور ہوئیں پلکیں بوجھل
شبنم کا رس پی گئیں کرنیں دن کا رنگ چمک اٹھا
گونج ہے بھنوروں کی کانوں میں پر ہیں آنکھوں سے اوجھل
حسن اور عشق کی اس دنیا میں کس نے کس کا ساتھ دیا
میں اپنے رستے جاتا ہوں اور تو اپنی ڈگر پر چل!
Targhib Aur Us Ke Baad
Targhib:
Phir main kaam mein lag jaaon ga aa fursat hai pyaar karain
Naagan si bal khaati uth aur meri god mein aan machal
Bhed bhaao ki basti mein koi bhed bhaao ka naam na le
Hasti par yoon chha ja badh kar sharminda ho jaaye ajal
Chhod yeh laaj ka ghoonghat kab tak rahe ga in aankhon ke saath
Chadhti raat hai dhalta suraj khadi khadi mat paao'n mal
Phir yeh jaadu so jaayega samay jo beeta gehri neend
Jo kuch hai anmol hai ab tak ek ek lamha ek ek pal
Bin chhui mitti ki khushboo us ka saundha saundha pan
Sab kuch chhan jaayega ek din ab bhi waqt hai dekh sambhal
Narm ragon mein meethi meethi tees jo yeh uthti hai aaj
Badhti mauj ka rela hai ik, tees na uthegi kal
Mast raseeli aankhon se yeh chhalki chhalki si ek shai
Jis ne aaj apnaaya us ko samjho us ke kaar saphal
Main tere sholon se khelon tu bhi meri aag se khel
Main bhi teri neend churaoon tu bhi meri neendain chhal
Narm hawa ke jhonkon hi se khulti hai phoolon ki aankh
Warna barson saath rahe hain thehra paani band kunwal!
Us ke baad:
Bheegi raat ka nasha toota doob gaya hai chadhta chand
Thake thake hain a'zaa saare aur hueen palkain bojhal
Shabnam ka ras pee gayin kirnain din ka rang chamak utha
Goonj hai bhawaroon ki kaanon mein par hain aankhon se ojhal
Husn aur ishq ki is duniya mein kis ne kis ka saath diya
Main apne raste jaata hoon aur tu apni dagar par chal!
شاعر کے بارے میں
اخترالایمان اردو نظم کے اُن اہم جدید شعرا میں شمار ہوتے ہیں جنہوں نے روایت کی تقلید کے بجائے فرد کی داخلی سچائی کو اپنی شاعری کا مرکز بنایا۔ ان کا ...
مکمل تعارف پڑھیں