عروس البلاد — اخترالایمان

Uroos-ul-Bilad

Wasee shahar mein ik cheekh kya sunaai de
Buson ke shor mein relon ki gadgadaahat mein
Chahal pehal mein bharon jaisi bhanbhanahat mein
Kisi ko pakdo sar-e-raah maar do chahe
Kisi afeefa ki ismat utaar do chahe!
Wasee shahar mein ik cheekh kya sunaai de!
Azeem shahar bade kaamon ke liye hain miyan
Wazeer-e-aala ki taqreer, leaderon ke juloos
Siyasaton ke mazaahir, khuloos behr-e-khuloos
Yeh rat-jaghon ki jagah, nao-nosh ka gadh hai
Yeh tum se kis ne kaha ilm-o-hosh ka gadh hai
Abhi abhi Shah-e-Qafqaz aaye hain dekho
Muazzizeen-e-Uroos-ul-Bilad sab mil kar
Sipaas naama inhein is tarah karenge pesh
Ke jaise dil ki kali phool ho gayi khul kar
Phir us ke baad kisi bank ke bade karta
Koi safeer kisi desh ke naye mukhiya
Musheer sanati mansooba bandiyon ke liye
Jatan saqafati aaina saaziyon ke liye
Bade plan, badi yojna, badi baatein
Ziyaftain, bade hotel, badi badi ghaatain!
Azeem shahar bade kaamon ke liye hai miyan!
Yahan mazaar hain un ke bhi jin ke naam nahin
Sunahri shahar ki taskheer karne aaye thay
Inhein shikam se bahut door aage jaana tha
Woh is jahan ki tameer karne aaye thay!
Bade dimaagh thay tabaa thay zaheen thay sab
Magar siyasat duniya mein kamtareen thay sab
Azeem shahar bade kaamon ke liye hain miyan
Shikast-e-dil koi rocket hai jo dikhai de
Azeem shahar mein ik cheekh kya sunaai de!