یادیں — اخترالایمان

Yaadein

Lo wo chaah-e-shab se nikla pichle pehar peela mehtaab
Zehen ne kholi rukte rukte maazi ki pareena kitab
Yaadon ke be-ma'ani daftar khwabon ke afsurda shahab
Sab ke sab khamosh zubaan se kehte hain aye khana kharab
Guzri baat sadi ya pal ho guzri baat hai naqsh bar aab
Yeh rudaad hai apne safar ki is aabaad kharaabe mein
Dekho hum ne kaise basar ki is aabaad kharaabe mein
Shahar-e-tamanna ke markaz mein laga hua hai mela sa
Khel khilaunon ka har soo hai ek rangeen gulzaar khula
Wo ek balak jis ko ghar se ek dirham bhi nahin mila
Mele ki saj dhaj mein kho kar baap ki ungli chhod gaya
Hosh aaya to khud ko tanha pa ke bohat hairan hua
Bheed mein raah mili nahin ghar ki is aabaad kharaabe mein
Dekho hum ne kaise basar ki is aabaad kharaabe mein
Wo balak hai aaj bhi hairan mela jyon ka tyon hai laga
Hairan hai bazaar mein chup chup kya kya bikta hai sauda
Kahin sharafat kahin najaabat kahin mohabbat kahin wafa
Aal aulaad kahin bikti hai kahin buzurg aur kahin khuda
Hum ne is ahmaq ko aakhir isi tazabzub mein chhoda
Aur nikali raah-e-mafar ki is aabaad kharaabe mein
Dekho hum ne kaise basar ki is aabaad kharaabe mein
Honth tabassum ke aadi hain warna rooh mein zehr aa gayin
Ghuppe hue hain itne nashtar jin ki koi ta'daad nahin
Kitni baar hui hai hum par tang yeh phaili hui zameen
Jis par naaz hai hum ko itna jhuki hai aksar wahi jabeen
Kabhi koi sufla hai aaqaa kabhi koi abla farzeen
Bechi laaj bhi apne hunar ki is aabaad kharaabe mein
Dekho hum ne kaise basar ki aabaad kharaabe mein
Kaale kos gham-e-ulfat ke aur main naan-e-shabeena jo
Kabhi chaman-zaron mein uljha aur kabhi gandum ki bo
Naqa-e-mushk-e-tattari ban kar liye phiri mujh ko har soo
Yehi hayaat-e-sa'iqa-fitrat bani ta'attul kabhi namu
Kabhi kiya ram-e-ishq se aise jaise koi wahshi aahoo
Aur kabhi mar mar ke sahar ki is aabaad kharaabe mein
Dekho hum kaise basar ki is aabaad kharaabe mein
Kabhi ghaneem-e-jaur-o-sitam ke hathon khai aisi maat
Arz-e-alam mein khwar hue hum bigde rahe barson halaat
Aur kabhi jab din nikla to beet gaye jag hui na raat
Har soo mah-wash sada qaatil lutf-o-inaayat ki saughaat
Shabnam aisi thandi nigahein phoolon ki mehkaar si baat
Jyon ton yeh manzil bhi sar ki is aabaad kharaabe mein
Dekho hum ne kaise basar ki is aabaad kharaabe mein
Raah-naward-e-shauq ko rah mein kaise kaise yaar mile
Abr-e-baharaan aks-e-nigaran khaal-e-rukh-e-dildar mile
Kuch bilkul mitti ke maadho kuch khanjar ki dhaar mile
Kuch manjhdhaar mein kuch sahil par kuch dariya ke paar mile
Hum sab se har haal mein lekin yoon hi haath pasaar mile
Sirf un ki khoobi pe nazar ki is aabaad kharaabe mein
Dekho hum ne kaise basar ki is aabaad kharaabe mein
Saari hai be-rabt kahani dhundle dhundle hain auraaq
Kahan hain wo sab jin se jab thi pal bhar ki doori bhi shaaq
Kahin koi naasoor nahin go ha'il hai barson ka firaaq
Karam-faramoshi ne dekho chaat liye kitne meesaq
Wo bhi hum ko ro baithe hain chalo hua qarz-e-be-baaq
Khuli to aakhir baat asar ki is aabaad kharaabe mein
Dekho hum ne kaise basar ki is aabaad kharaabe mein
Khwab the ek din auj-e-zameen se kahkashaan ko chhoo lenge
Khulenge gul rang shafaq se qaus-e-qazah mein jhooleinge
Baad-e-bahari ban ke chaleinge sarson ban kar phooleinge
Khushiyon ke rangeen jhurmat mein ranj-o-mehn sab bhooleinge
Daagh-e-gul-o-ghuncha ke badle mehki hui khushboo lenge
Mili khalish par zakhm-e-jigar ki is aabaad kharaabe mein
Dekho hum ne kaise basar ki is aabaad kharaabe mein
Khwar hue damri ke peeche aur kabhi jholi bhar maal
Aise chhod ke uthe jaise chhupa to kar dega kangal
Sayaane ban kar baat bigadi theek padi saada si chaal
Chhaana dasht-e-mohabbat kitna aabla pa Majnun ki misaal
Kabhi Sikandar kabhi Qalandar kabhi bagoola kabhi khayal
Swaang rachaaye aur guzar ki is aabaad kharaabe mein
Dekho hum ne kaise basar ki is aabaad kharaabe mein
Zeest khuda jaane hai kya shai bhook tajassus ashk-e-faraar
Phool se bache zehra jabeenein mard-e-mujassam baagh-o-bahaar
Murjha jaate hain aksar kyun kaun hai wo jis ne beemaar
Kiya hai rooh-e-arz ko aakhir aur yeh zehreele afkaar
Kis mitti se ugte hain sab jeena kyun hai ek begaar
In baton se qata-e-nazar ki is aabaad kharaabe mein
Dekho hum ne kaise basar ki aabaad kharaabe mein
Dur kahin wo koel kooki raat ke sannate mein dur
Kachhi zameen par bikhra hoga mehka mehka aam ka boor
Baar-e-mashaqqat kam karne ko khaliyanon mein kaam se choor
Kam sin ladke gaate honge lo dekho wo subh ka noor
Chaah-e-shab se phoot ke nikla main maghmoom kabhi masroor
Soch raha hoon idhar udhar ki is aabaad kharaabe mein
Dekho hum ne kaise basar ki is aabaad kharaabe mein
Neend se ab bhi dur hain aankhein go ke rahein shab bhar be-khwab
Yaadon ke be-ma'ani daftar khwabon ke afsurda shahab
Sab ke sab khamosh zubaan se kehte hain aye khana kharab
Guzri baat sadi ya pal ho guzri baat hai naqsh bar aab
Mustaqbil ki soch, utha yeh maazi ki pareena kitab
Manzil hai yeh hosh-o-khabar ki is aabaad kharaabe mein
Dekho hum ne kaise basar ki is aabaad kharaabe mein