دل میں یاد بت بے پیر لیے بیٹھا ہوں — آرزو لکھنوی
شاعر
دل میں یاد بت بے پیر لیے بیٹھا ہوں
دل میں یاد بت بے پیر لیے بیٹھا ہوں
یعنی اک ظلم کی تصویر لیے بیٹھا ہوں
آہ میں درد کی تاثیر لیے بیٹھا ہوں
دل میں اک خون بھرا تیر لیے بیٹھا ہوں
اک ذرا سی خلش درد جگر پر یہ گھمنڈ
جیسے کل عشق کی جاگیر لیے بیٹھا ہوں
ہے مجھے ساز طرب سوختہ سامانی دل
پردۂ خاک میں اکسیر لیے بیٹھا ہوں
چور شیشے پہ نظر پڑتے ہی دل یاد آیا
مٹنے والے تری تصویر لیے بیٹھا ہوں
قید کو توڑ کے سمجھا کہ سہارا توڑا
ہاتھ میں پاؤں کی زنجیر لیے بیٹھا ہوں
آرزوؔ ہو چکی سو مرتبہ دنیا بیدار
اور میں سوئی ہوئی تقدیر لیے بیٹھا ہوں
Dil mein yaad-e-but-e-be-pīr liye baiṭhā huun
Dil mein yaad-e-but-e-be-pīr liye baiṭhā huun
Ya'nī ek zulm kī tasveer liye baiṭhā huun
Aah mein dard kī tāseer liye baiṭhā huun
Dil mein ek khoon bharā teer liye baiṭhā huun
Ek zarā sī khalish-e-dard-e-jigar par ye ghamanḍ
Jaise kal ishq kī jāgeer liye baiṭhā huun
Hai mujhe sāz-e-tarab sokhta sāmānī-e-dil
Parda-e-khāk mein ekseer liye baiṭhā huun
Choor sheeshe pe nazar paṛte hi dil yaad āyā
Miṭne waale terī tasveer liye baiṭhā huun
Qaid ko toṛ ke samjhā ke sahārā toṛā
Haath mein pāun kī zanjeer liye baiṭhā huun
Aarzoo ho chukī sau martaba duniyā bedār
Aur main soī hui taqdeer liye baiṭhā huun
شاعر کے بارے میں
آرزو لکھنوی اردو کے اُن ہمہ جہت اور قدآور شعرا میں شمار ہوتے ہیں جنہوں نے کلاسیکی روایت کو جدید تقاضوں سے ہم آہنگ کیا۔ ان کا اصل نام سید انور حسین ...
مکمل تعارف پڑھیں