اعتراف — اسرار الحق مجاز

Aitraaf

Ab mere paas tum aayi ho to kya aayi ho
Main ne mana ke tum ik paikar-e-ra'anai ho
Chaman-e-dahr mein ruh-e-chaman-arai ho
Talat-e-mehr ho firdos ki barnai ho
Bint-e-mehtab ho gardon se utar aayi ho
Mujh se milne mein ab andesha-e-ruswai hai
Main ne khud apne kiye ki ye saza paayi hai
Khak mein aah milayi hai jawani main ne
Shola-zaron mein jalayi hai jawani main ne
Shehr-e-khooban mein ganwayi hai jawani main ne
Khwab-gahon mein jagayi hai jawani main ne
Husn ne jab bhi inayat ki nazar dali hai
Mere paiman-e-mohabbat ne sipar dali hai
In dinon mujh pe qayamat ka junoon tari tha
Sar pe sarshari-e-ishrat ka junoon tari tha
Mah-paron se mohabbat ka junoon tari tha
Shehryaron se raqabat ka junoon tari tha
Bistar-e-makhmal o sanjab thi duniya meri
Ek rangin o hasin khwab thi duniya meri
Jannat-e-shauq thi begana-e-afat-e-samoom
Dard jab dard na ho kawish-e-darmaan maloom
Khak the dida-e-bebakh mein gardon ke nujoom
Bazm-e-parveen thi nigahon mein kanizon ka hujoom
Laila-e-naz bar-afganda niqab aati thi
Apni aankhon mein liye dawat-e-khwab aati thi
Sang ko gauhar-e-nayab o garan jana tha
Dasht-e-pur-khar ko firdos-e-jawan jana tha
Raig ko silsila-e-aab-e-rawan jana tha
Aah ye raaz abhi main ne kahan jana tha
Meri har fateh mein hai ek hazimat-e-pinhan
Har masarrat mein hai raaz-e-gham o hasrat-e-pinhan
Kya sunogi meri majrooh jawani ki pukar
Meri faryad-e-jigar-doz mera nala-e-zaar
Shiddat-e-karb mein doobi hui meri guftar
Main ke khud apne mazaq-e-tarab-agin ka shikar
Woh gudaz-e-dil-e-marhoom kahan se laoon
Ab main woh jazba-e-masum kahan se laoon
Mere saye se daro tum meri qurbat se daro
Apni jurrat ki qasam ab meri jurrat se daro
Tum latafat ho agar meri latafat se daro
Mere waadon se daro meri mohabbat se daro
Ab main altaf o inayat ka saza war nahin
Main wafadar nahin haan main wafadar nahin
Ab mere paas tum aayi ho to kya aayi ho