ایک دوست کی خوش مذاقی پر — اسرار الحق مجاز
شاعر
ایک دوست کی خوش مذاقی پر
ہو نہیں سکتا تری اس "خوش مذاقی" کا جواب
شام کا دلکش سماں اور تیرے ہاتھوں میں کتاب
رکھ بھی دے اب اس کتابِ خشک کو بالائے طاق
اُڑ رہا ہے رنگ و بُو کی بزم میں تیرا مذاق
چھُپ رہا ہے پردۂ مغرب میں مہرِ زرفشاں
دید کے قابل ہیں بادل میں شفق کی سرخیاں
موجزن جوئے شفق ہے اس طرح زیرِ سحاب
جس طرح رنگین شیشوں میں جھلکتی ہے شراب
اِک نگارِ آتشیں ہر شے پہ ہے چھایا ہوا
جیسے عارض پر عروسِ نو کے ہو رنگِ حیا
شانۂ گیتی پہ لہرانے کو ہیں گیسوئے شب
آسماں پر منعقد ہونے کو ہے بزمِ طرب
اڑ رہے ہیں جستجو میں آشیانوں کے طیور
آ چلا ہے آئنے میں چاند کے ہلکا سا نُور
دیکھ کر یہ شام کے نظارہ ہائے دل نشیں
کیا ترے دل میں ذرا بھی گدگدی ہوتی نہیں؟
کیا تری نظروں میں یہ رنگینیاں بھاتی نہیں؟
کیا ہوائے سرد تیرے دل کو تڑپاتی نہیں؟
کیا نہیں ہوتی تجھے محسوس مجھ کو سچ بتا
تیز جھونکوں میں ہوا کے گنگنانے کی صدا؟
سبزہ و گُل دیکھ کر تجھ کو خوشی ہوتی نہیں
اُف ترے احساس میں اتنی بھی رنگینی نہیں
حسنِ فطرت کی لطافت کا جو تُو قائل نہیں
میں یہ کہتا ہوں تجھے جینے کا حق حاصل نہیں
Ek Dost Ki Khush Mazaqi Par
Ho nahin sakta teri is "khush mazaqi" ka jawab
Sham ka dilkash samaan aur tere hathon mein kitaab
Rakh bhi de ab is kitab-e-khushk ko balaye taaq
Ud raha hai rang o bu ki bazm mein tera mazaq
Chhup raha hai parda-e-maghrib mein mehr-e-zarfishaan
Deed ke qabil hain badal mein shafaq ki surkhiyan
Maujzan ju-e-shafaq hai is tarah zer-e-sahab
Jis tarah rangin shishon mein jhalakti hai sharab
Ik nigar-e-atishin har shai pe hai chhaya hua
Jaise ariz par uroos-e-nau ke ho rang-e-haya
Shana-e-geeti pe lehrane ko hain gesu-e-shab
Aasman par munaqqad hone ko hai bazm-e-tarab
Ud rahe hain justaju mein ashiyanon ke tuyur
Aa chala hai aaine mein chand ke halka sa noor
Dekh kar ye sham ke nazara-haye dil nasheen
Kya tere dil mein zara bhi gadgadi hoti nahin?
Kya teri nazron mein ye ranginiyan bhati nahin?
Kya hawa-e-sard tere dil ko tadpati nahin?
Kya nahin hoti tujhe mahsus mujh ko sach bata
Tez jhonkon mein hawa ke gungunane ki sada?
Sabza o gul dekh kar tujh ko khushi hoti nahin
Uff tere ehsas mein itni bhi rangini nahin
Husn-e-fitrat ki latafat ka jo tu qail nahin
Main ye kehta hoon tujhe jeene ka haq hasil nahin
شاعر کے بارے میں
اسرار الحق مجاز، جنہیں ہم شاعری میں تخلص مجاز کے نام سے جانتے ہیں، اردو ادب کے عظیم غزل گو اور نثر نگار تھے۔ وہ ۱۹ اکتوبر ۱۹۱۱ کو قریہ روداولی، ضلع...
مکمل تعارف پڑھیں