فریاد ہے اب لب پر جب اشک فشانی تھی — بہزاد لکھنوی
شاعر
فریاد ہے اب لب پر جب اشک فشانی تھی
فریاد ہے اب لب پر جب اشک فشانی تھی
یہ اور کہانی ہے وہ اور کہانی تھی
اب دل میں رہا کیا ہے جز حسرت و ناکامی
وہ نیش کہاں باقی خود جس کی نشانی تھی
جب درد سا تھا دل میں اب درد ہی خود دل ہے
ہاں اب جو حقیقت ہے پہلے یہ کہانی تھی
پر آب سی رہتی تھیں پہلے یہ مری آنکھیں
ہاں ہاں اسی دریا میں اشکوں کی روانی تھی
اے چشم حقیقت میں دنیا کو یہ سمجھا دے
باقی بھی وہی نکلی جو چیز کہ فانی تھی
بلبل نے تو افسانہ اپنا ہی سنایا تھا
گلشن کی کہانی تو پھولوں کی زبانی تھی
یوں اشک بہائے تھے یوں کیں نہ تھیں فریادیں
اک بات چھپانی تھی اک بات بتانی تھی
سادہ نظر آتا ہے اب تو ورق دامن
اب تک مرے دامن پر آنکھوں کی نشانی تھی
بہزادؔ کا وہ عالم بھی خوب ہی عالم تھا
بہزادؔ کی نظروں میں ہر چیز جوانی تھی
Faryaad hai ab lab par jab ashk-fishani thi
Faryaad hai ab lab par jab ashk-fishani thi
Yeh aur kahani hai woh aur kahani thi
Ab dil mein raha kya hai juz hasrat-o-nakami
Woh nesh kahan baaqi khud jis ki nishani thi
Jab dard sa tha dil mein ab dard hi khud dil hai
Haan ab jo haqiqat hai pehle yeh kahani thi
Pur-aab si rehti theen pehle yeh meri aankhen
Haan haan isi darya mein ashkon ki rawani thi
Ae chashm-e-haqiqat mein duniya ko yeh samjha de
Baqi bhi wohi nikli jo cheez ke fani thi
Bulbul ne to afsana apna hi sunaya tha
Gulshan ki kahani to phoolon ki zubani thi
Yun ashk bahaye the yun keen na theen faryadein
Ek baat chhupani thi ek baat batani thi
Saada nazar aata hai ab to waraq-e-daman
Ab tak mere daman par aankhon ki nishani thi
Behzad ka woh aalam bhi khoob hi aalam tha
Behzad ki nazron mein har cheez jawani thi
شاعر کے بارے میں
بہزاد لکھنوی اردو ادب کے معروف شعرا میں شمار ہوتے ہیں، خصوصاً غزل گوئی، فلمی نغمہ نگاری اور کلاسیکی لب و لہجے کی وجہ سے انہیں نمایاں مقام حاصل ہے۔ ...
مکمل تعارف پڑھیں