خوشی محسوس کرتا ہوں نہ غم محسوس کرتا ہوں — بہزاد لکھنوی
شاعر
خوشی محسوس کرتا ہوں نہ غم محسوس کرتا ہوں
خوشی محسوس کرتا ہوں نہ غم محسوس کرتا ہوں
مگر ہاں دل میں کچھ کچھ زیر و بم محسوس کرتا ہوں
محبت کی یہ نیرنگی بھی دنیا سے نرالی ہے
الم کوئی نہیں لیکن الم محسوس کرتا ہوں
مری نظروں میں اب باقی نہیں ہے ذوق کفر و دیں
میں اک مرکز پہ اب دیر و حرم محسوس کرتا ہوں
جو لطف زندگانی مل رہا تھا گھٹتا جاتا ہے
خلش جو دل میں رہتی تھی وہ کم محسوس کرتا ہوں
تمہارے ذکر پر کب منحصر ہے دل کی بیتابی
کسی کا ذکر ہو میں چشم نم محسوس کرتا ہوں
کبھی پاتا ہوں دل میں ایک حشر درد بیتابی
کبھی میں اپنے دل میں درد و غم محسوس کرتا ہوں
زباں پر میری شکوہ آ نہیں سکتا زمانے کا
کہ ہر عالم کو میں ان کا کرم محسوس کرتا ہوں
یہ دل میں ہے جو گھبراہٹ یہ آنکھوں میں ہے جو آنسو
اس احساں کو بھی بالائے کرم محسوس کرتا ہوں
خوشی کی مجھ کو اب بہزاد کچھ حاجت نہیں باقی
کہ غم کو بھی میں اب ان کا کرم محسوس کرتا ہوں
Khushi mehsoos karta hoon na gham mehsoos karta hoon
Khushi mehsoos karta hoon na gham mehsoos karta hoon
Magar haan dil mein kuch kuch zair-o-bam mehsoos karta hoon
Mohabbat ki yeh nairangi bhi duniya se nirali hai
Alam koi nahin lekin alam mehsoos karta hoon
Meri nazron mein ab baqi nahin hai zauq-e-kufr-o-deen
Main ek markaz pe ab dair-o-haram mehsoos karta hoon
Jo lutf-e-zindagani mil raha tha ghat'ta jata hai
Khalish jo dil mein rehti thi woh kam mehsoos karta hoon
Tumhare zikr par kab munhasir hai dil ki betaabi
Kisi ka zikr ho main chashm-e-nam mehsoos karta hoon
Kabhi paata hoon dil mein ek hashar-e-dard-e-betaabi
Kabhi main apne dil mein dard-o-gham mehsoos karta hoon
Zaban par meri shikwa aa nahin sakta zamane ka
Ke har aalam ko main un ka karam mehsoos karta hoon
Yeh dil mein hai jo ghabrahat yeh aankhon mein hai jo aansoo
Is ehsan ko bhi balaa-e-karam mehsoos karta hoon
Khushi ki mujh ko ab Behzad kuch haajat nahin baqi
Ke gham ko bhi main ab un ka karam mehsoos karta hoon
شاعر کے بارے میں
بہزاد لکھنوی اردو ادب کے معروف شعرا میں شمار ہوتے ہیں، خصوصاً غزل گوئی، فلمی نغمہ نگاری اور کلاسیکی لب و لہجے کی وجہ سے انہیں نمایاں مقام حاصل ہے۔ ...
مکمل تعارف پڑھیں