تصور میں کوئی پھر آ رہا ہے — بہزاد لکھنوی
شاعر
تصور میں کوئی پھر آ رہا ہے
تصور میں کوئی پھر آ رہا ہے
الٰہی خیر دل گھبرا رہا ہے
وہ یوں دل کی فضا پر چھا رہے ہیں
کہ دل مغرور ہوتا جا رہا ہے
سمجھ میں کچھ نہیں آتا ہے ناصح
کہ تو بے کار کیوں سمجھا رہا ہے
محبت کرتی ہے اس کی پرستش
کہ تو جس دل کو یوں ٹھکرا رہا ہے
تصور دے رہا ہے خوب دھوکہ
کہ کوئی آ رہا ہے جا رہا ہے
ارے ساقی مرا پیمانۂ دل
شراب آرزو چھلکا رہا ہے
محبت دیکھ اے میری محبت
مرے دل کو کوئی برما رہا ہے
کسی کے حسن کی اللہ رے گرمی
محبت کو پسینہ آ رہا ہے
ذرا خاموش ہو بہزادؔ مضطر
ترے اشعار کوئی گا رہا ہے
Tasawwur mein koi phir aa raha hai
Tasawwur mein koi phir aa raha hai
Ilahi khair dil ghabra raha hai
Woh yun dil ki fiza par chha rahe hain
Ke dil maghroor hota ja raha hai
Samajh mein kuch nahin aata hai nasih
Ke tu bekar kyun samjha raha hai
Mohabbat karti hai us ki parastish
Ke tu jis dil ko yun thukra raha hai
Tasawwur de raha hai khoob dhoka
Ke koi aa raha hai ja raha hai
Are saqi mera paimana-e-dil
Sharab-e-arzoo chhalka raha hai
Mohabbat dekh aye meri mohabbat
Mere dil ko koi barma raha hai
Kisi ke husn ki Allah re garmi
Mohabbat ko paseena aa raha hai
Zara khamosh ho Behzad-e-Muztar
Tere ash'aar koi ga raha hai
شاعر کے بارے میں
بہزاد لکھنوی اردو ادب کے معروف شعرا میں شمار ہوتے ہیں، خصوصاً غزل گوئی، فلمی نغمہ نگاری اور کلاسیکی لب و لہجے کی وجہ سے انہیں نمایاں مقام حاصل ہے۔ ...
مکمل تعارف پڑھیں