تمہارے حسن کی تسخیر عام ہوتی ہے — بہزاد لکھنوی
شاعر
تمہارے حسن کی تسخیر عام ہوتی ہے
تمہارے حسن کی تسخیر عام ہوتی ہے
کہ اک نگاہ میں دنیا تمام ہوتی ہے
جہاں پہ جلوۂ جاناں ہے انجمن آرا
وہاں نگاہ کی منزل تمام ہوتی ہے
وہی خلش وہی سوزش وہی تپش وہی درد
ہمیں سحر بھی بہ انداز شام ہوتی ہے
نگاہ حسن مبارک تجھے در اندازی
کبھی کبھی مری محفل بھی عام ہوتی ہے
زہے نصیب میں قربان اپنی قسمت کے
ترے لیے مری دنیا تمام ہوتی ہے
نماز عشق کا ہے انحصار اشکوں تک
یہ بے نیاز سجود و قیام ہوتی ہے
تری نگاہ کے قرباں تری نگاہ کی ٹیس
یہ ناتمام ہی رہ کر تمام ہوتی ہے
وہاں پہ چل مجھے لے کر مرے سمند خیال
جہاں نگاہ کی مستی حرام ہوتی ہے
کسی کے ذکر سے بہزادؔ مبتلا اب تک
جگر میں اک خلش نا تمام ہوتی ہے
Tumhare husn ki taskheer aam hoti hai
Tumhare husn ki taskheer aam hoti hai
Ke ek nigah mein duniya tamaam hoti hai
Jahan pe jalwa-e-jaanaan hai anjuman aara
Wahan nigah ki manzil tamaam hoti hai
Wahi khalish, wahi sozish, wahi tapish, wahi dard
Hamein sahar bhi ba-andaaz-e-shaam hoti hai
Nigah-e-husn mubarak tujhe dar andaazi
Kabhi kabhi meri mehfil bhi aam hoti hai
Zahe naseeb main qurban apni qismat ke
Tere liye meri duniya tamaam hoti hai
Namaz-e-ishq ka hai inhisar ashkon tak
Yeh be-niyaz sajood-o-qiyaam hoti hai
Teri nigah ke qurban, teri nigah ki tees
Yeh na-tamaam hi rah kar tamaam hoti hai
Wahan pe chal mujhe le kar mere samand-e-khayal
Jahan nigah ki masti haraam hoti hai
Kisi ke zikr se Behzad mubtala ab tak
Jigar mein ek khalish na-tamaam hoti hai
شاعر کے بارے میں
بہزاد لکھنوی اردو ادب کے معروف شعرا میں شمار ہوتے ہیں، خصوصاً غزل گوئی، فلمی نغمہ نگاری اور کلاسیکی لب و لہجے کی وجہ سے انہیں نمایاں مقام حاصل ہے۔ ...
مکمل تعارف پڑھیں