یوں تو جو چاہے یہاں صاحب محفل ہو جائے — بہزاد لکھنوی
شاعر
یوں تو جو چاہے یہاں صاحب محفل ہو جائے
یوں تو جو چاہے یہاں صاحب محفل ہو جائے
بزم اس شخص کی ہے تو جسے حاصل ہو جائے
ناخدا اے مری کشتی کے چلانے والے
لطف تو جب ہے کہ ہر موج ہی ساحل ہو جائے
اس لیے چل کے ہر اک گام پہ رک جاتا ہوں
تا نہ بے کیف غم دورئ منزل ہو جائے
تجھ کو اپنی ہی قسم یہ تو بتا دے مجھ کو
کیا یہ ممکن ہے کبھی تو مجھے حاصل ہو جائے
ہائے اس وقت دل زار کا عالم کیا ہو
گر محبت ہی محبت کے مقابل ہو جائے
پھیکا پھیکا ہے مری بزم محبت کا چراغ
تم جو آ جاؤ تو کچھ رونق محفل ہو جائے
تیری نظریں جو ذرا مجھ پہ کرم فرمائیں
تیری نظروں کی قسم پھر یہی دل دل ہو جائے
ہوش اس کے ہیں یہ جام اس کا ہے تو ہے اس کا
مے کدے میں ترے جو شخص بھی غافل ہو جائے
فتنہ گر شوق سے بہزادؔ کو کر دے پامال
اس سے تسکین دلی گر تجھے حاصل ہو جائے
Yun to jo chahe yahan sahib-e-mehfil ho jaye
Yun to jo chahe yahan sahib-e-mehfil ho jaye
Bazm us shakhs ki hai tu jise haasil ho jaye
Nakhuda ae meri kashti ke chalaane wale
Lutf to jab hai ke har mauj hi saahil ho jaye
Is liye chal ke har ik gaam pe ruk jaata hoon
Ta na be-kaif gham-e-doori-e-manzil ho jaye
Tujh ko apni hi qasam ye to bata de mujh ko
Kya ye mumkin hai kabhi tu mujhe haasil ho jaye
Haaye us waqt dil-e-zaar ka aalam kya ho
Gar muhabbat hi muhabbat ke muqabil ho jaye
Pheeka pheeka hai meri bazm-e-muhabbat ka chiragh
Tum jo aa jao to kuch raunaq-e-mehfil ho jaye
Teri nazrein jo zara mujh pe karam farmaayen
Teri nazron ki qasam phir yehi dil dil ho jaye
Hosh us ke hain ye jaam us ka hai tu hai us ka
Mai-kade mein tere jo shakhs bhi ghafil ho jaye
Fitna-gar shauq se Behzad ko kar de paamaal
Is se taskeen-e-dili gar tujhe haasil ho jaye
شاعر کے بارے میں
بہزاد لکھنوی اردو ادب کے معروف شعرا میں شمار ہوتے ہیں، خصوصاً غزل گوئی، فلمی نغمہ نگاری اور کلاسیکی لب و لہجے کی وجہ سے انہیں نمایاں مقام حاصل ہے۔ ...
مکمل تعارف پڑھیں