اپنی رسوائی کا احساس تو اب کچھ بھی نہیں — احسان دانش
شاعر
اپنی رسوائی کا احساس تو اب کچھ بھی نہیں
اپنی رسوائی کا احساس تو اب کچھ بھی نہیں
ہونٹ ہی سن ہیں خموشی کا سبب کچھ بھی نہیں
یہ اجالوں کے جزیرے یہ سرابوں کے دیار
سحر و افسوں کے سوا جشن طرب کچھ بھی نہیں
بہہ گئے وقت کے سیلاب میں جسموں کے سہاگ
اب نہ وہ چشم نہ رخسار نہ لب کچھ بھی نہیں
ریزہ ریزہ ہے کسی خواب زر افشاں کا طلسم
فصل گل انجم و مہتاب یہ سب کچھ بھی نہیں
میرے آنسو انہیں کرتے ہیں اجاگر کچھ اور
پہلے جو لوگ سبھی کچھ تھے اور اب کچھ بھی نہیں
ہم پہ تو صبح سے روشن تھی یہ شام بے کیف
تم کو اس شام سے اندازۂ شب کچھ بھی نہیں
شہر دل شہر خموشاں کی طرح ہے گنجان
کتنا آباد مگر شور و شغب کچھ بھی نہیں
یہ جہاں عالم اسباب ہے ناداں نہ بنو
کون مانے گا تباہی کا سبب کچھ بھی نہیں
رنگ و بو گل سے مکر جائیں تو رہتا کیا ہے
آگ بجھ جائے تو سورج کا لقب کچھ بھی نہیں
خول ہی خول ہے نوخیز دبستان خیال
شور ہی شور ہے تخلیق ادب کچھ بھی نہیں
گم رہو گم کہ یہاں جرم ہے اظہار کمال
چپ رہو چپ کہ یہاں نام و نسب کچھ بھی نہیں
میری تخریب سے یاروں کا بھلا کیا ہوگا
میری پونجی تو بجز ذوق ادب کچھ بھی نہیں
اس طرف وا ہے در رحمت یزداں دانشؔ
اس طرف وسعت دامان طلب کچھ بھی نہیں
Apni ruswai ka ehsaas to ab kuch bhi nahin
Apni ruswai ka ehsaas to ab kuch bhi nahin
Hont hi sun hain khamoshi ka sabab kuch bhi nahin
Ye ujalon ke jazire ye sarabon ke dayar
Sahar o afsoon ke siwa jashn e tarab kuch bhi nahin
Beh gaye waqt ke sailaab mein jismon ke suhag
Ab na woh chashm na rukhsar na lab kuch bhi nahin
Reza reza hai kisi khwab e zar afshan ka tilism
Fasl e gul anjum o mahtab ye sab kuch bhi nahin
Mere aansoo unhein karte hain ujagar kuch aur
Pehle jo log sabhi kuch the aur ab kuch bhi nahin
Hum pe to subah se roshan thi ye sham e be-kaif
Tum ko is sham se andaza-e-shab kuch bhi nahin
Shehar e dil shehar e khamoshan ki tarah hai gunjan
Kitna abaad magar shor o shaghab kuch bhi nahin
Ye jahan alam e asbab hai nadan na bano
Kon maane ga tabahi ka sabab kuch bhi nahin
Rang o boo gul se mukar jayen to rehta kya hai
Aag bujh jaye to suraj ka laqab kuch bhi nahin
Khaul hi khaul hai nau-khez dabistan e khayal
Shor hi shor hai takhleeq e adab kuch bhi nahin
Gum raho gum ke yahan jurm hai izhar e kamal
Chup raho chup ke yahan naam o nasab kuch bhi nahin
Meri takhreeb se yaron ka bhala kya hoga
Meri poonji to bajuz zauq e adab kuch bhi nahin
Is taraf wa hai dar e rehmat e Yazdan Danish
Is taraf wus'at e daman e talab kuch bhi nahin
شاعر کے بارے میں
احسانؔ دانش اردو کے اُن ممتاز اور منفرد شاعروں میں شمار ہوتے ہیں جن کی زندگی خود جدوجہد، محنت اور خودداری کی عملی تصویر تھی۔ ان کا اصل نام احسان ال...
مکمل تعارف پڑھیں