کبھی کبھی جو وہ غربت کدے میں آئے ہیں — احسان دانش
شاعر
کبھی کبھی جو وہ غربت کدے میں آئے ہیں
کبھی کبھی جو وہ غربت کدے میں آئے ہیں
مرے بہے ہوئے آنسو جبیں پہ لائے ہیں
نہ سرگزشت سفر پوچھ مختصر یہ ہے
کہ اپنے نقش قدم ہم نے خود مٹائے ہیں
نظر نہ توڑ سکی آنسوؤں کی چلمن کو
وہ روز اگرچہ مرے آئینے میں آئے ہیں
اس ایک شمع سے اترے ہیں بام و در کے لباس
اس ایک لو نے بڑے پھول بن جلائے ہیں
یہ دوپہر یہ زمیں پر لپا ہوا سورج
کہیں درخت نہ دیوار و در کے سائے ہیں
کلی کلی میں ہے دھرتی کے دودھ کی خوشبو
تمام پھول اسی ایک ماں کے جائے ہیں
نظر خلاؤں پہ اور انتظار بے وعدہ
بہ ایں عمل بھی وہ آنکھوں میں جھلملائے ہیں
فسون شعر سے ہم اس مہ گریزاں کو
خلاؤں سے سر کاغذ اتار لائے ہیں
رسالہ ہاتھ سے رکھتے نہ کیوں وہ شرما کر
غزل پڑھی ہے تو ہم سامنے بھی آئے ہیں
چلے ہیں خیر سے ان کو پکارنے دانشؔ
مگر وہ یوں تو نہ آئیں گے اور نہ آئے ہیں
Kabhi kabhi jo wo ghurbat-kade mein aaye hain
Kabhi kabhi jo wo ghurbat-kade mein aaye hain
Mere bahe hue aansoo jabeen pe laaye hain
Na sarguzasht-e-safar poochh mukhtasar ye hai
Ki apne naqsh-e-qadam hum ne khud mitaye hain
Nazar na tod saki aansuon ki chilman ko
Wo roz agarche mere aaine mein aaye hain
Is ek shama se utre hain baam o dar ke libas
Is ek lau ne bade phool ban jalaye hain
Ye dopahar ye zamin par lipa hua suraj
Kahin darakht na deewar o dar ke saye hain
Kali kali mein hai dharti ke doodh ki khushboo
Tamam phool isi ek maan ke jaaye hain
Nazar khalaon pe aur intizar be-waada
Ba ein amal bhi wo aankhon mein jhilmilaye hain
Fasoon-e-sher se hum us mah-e-gurezan ko
Khalaon se sar-e-kaghaz utar laaye hain
Risala hath se rakhte na kyun wo sharma kar
Ghazal padhi hai to hum samne bhi aaye hain
Chale hain khair se un ko pukarne Danish,
Magar wo yun to na aayenge aur na aaye hain
شاعر کے بارے میں
احسانؔ دانش اردو کے اُن ممتاز اور منفرد شاعروں میں شمار ہوتے ہیں جن کی زندگی خود جدوجہد، محنت اور خودداری کی عملی تصویر تھی۔ ان کا اصل نام احسان ال...
مکمل تعارف پڑھیں