کچھ لوگ جو سوار ہیں کاغذ کی ناؤ پر — احسان دانش
شاعر
کچھ لوگ جو سوار ہیں کاغذ کی ناؤ پر
کچھ لوگ جو سوار ہیں کاغذ کی ناؤ پر
تہمت تراشتے ہیں ہوا کے دباؤ پر
موسم ہے سرد مہر لہو ہے جماؤ پر
چوپال چپ ہے بھیڑ لگی ہے الاؤ پر
سب چاندنی سے خوش ہیں کسی کو خبر نہیں
پھاہا ہے ماہتاب کا گردوں کے گھاؤ پر
اب وہ کسی بساط کی فہرست میں نہیں
جن منچلوں نے جان لگا دی تھی داؤ پر
سورج کے سامنے ہیں نئے دن کے مرحلے
اب رات جا چکی ہے گزشتہ پڑاؤ پر
گلدان پر ہے نرم سویرے کی زرد دھوپ
حلقہ بنا ہے کانپتی کرنوں کا گھاؤ پر
یوں خود فریبیوں میں سفر ہو رہا ہے طے
بیٹھے ہیں پل پہ اور نظر ہے بہاؤ پر
موسم سے ساز غیرت گلشن سے بے نیاز
حیرت ہے مجھ کو اپنے چمن کے سبھاؤ پر
کیا دور ہے کہ مرہم زنگار کی جگہ
اب چارہ گر شراب چھڑکتے ہیں گھاؤ پر
تاجر یہاں اگر ہیں یہی غیرت یہود
پانی بکے گا خون شہیداں کے بھاؤ پر
پہلے کبھی رواج بنی تھی نہ بے حسی
نادم بگاڑ پر ہیں نہ خوش میں بناؤ پر
ہر رنگ سے پیام اترتے ہیں روح میں
پڑتی ہے جب نگاہ دھنک کے جھکاؤ پر
دانشؔ مرے شریک سفر ہیں وہ کج مزاج
ساحل نے جن کو پھینک دیا ہے بہاؤ پر
Kuch log jo sawar hain kagaz ki naao par
Kuch log jo sawar hain kagaz ki naao par
Tohmat tarashte hain hawa ke dabao par
Mausam hai sard mehar lahu hai jamao par
Chaupal chup hai bheed lagi hai alaao par
Sab chandni se khush hain kisi ko khabar nahin
Phaha hai mahtaab ka gardoon ke ghaao par
Ab woh kisi bisat ki fehrist mein nahin
Jin manchalon ne jaan laga di thi daao par
Suraj ke saamne hain naye din ke marhale
Ab raat ja chuki hai guzishta padao par
Guldaan par hai narm sawere ki zard dhoop
Halqa bana hai kaanpti kirnon ka ghaao par
Yun khud farebiyon mein safar ho raha hai tay
Baithe hain pul pe aur nazar hai bahao par
Mausam se saaz-e-ghairat gulshan se be-niyaaz
Hairat hai mujh ko apne chaman ke subhao par
Kya daur hai ke marham-e-zangaar ki jagah
Ab chara-gar sharab chhidakte hain ghaao par
Tajir yahan agar hain yehi ghairat-e-Yahood
Paani bike ga khoon-e-shaheedan ke bhaao par
Pehle kabhi riwaj bani thi na be-hisi
Naadim bighaad par hain na khush main banao par
Har rang se payam utarte hain rooh mein
Padti hai jab nigah dhanak ke jhukao par
Danish mere shareek-e-safar hain woh kaj mizaaj
Sahil ne jin ko phenk diya hai bahao par
شاعر کے بارے میں
احسانؔ دانش اردو کے اُن ممتاز اور منفرد شاعروں میں شمار ہوتے ہیں جن کی زندگی خود جدوجہد، محنت اور خودداری کی عملی تصویر تھی۔ ان کا اصل نام احسان ال...
مکمل تعارف پڑھیں