زندگی میں اس کو کیف زندگی حاصل نہیں — احسان دانش
شاعر
زندگی میں اس کو کیف زندگی حاصل نہیں
زندگی میں اس کو کیف زندگی حاصل نہیں
جس کا دل راز و نیاز عشق کے قابل نہیں
حسن کے پردے میں ہو سکتا نہیں ہرگز قرار
روز اول سے یہ لیلیٰ خوگر محمل نہیں
قدر کر دل کی کہ درگاہ خدا میں اے ندیم
دو جہاں کی نعمتیں حاضر ہیں لیکن دل نہیں
ہوشیار اے مست و مدہوش جوانی ہوشیار
عشق وہ دریا ہے جو منت کش ساحل نہیں
ضبط نالہ ضبط گریہ ضبط الفت ضبط شوق
کس طرح کہہ دوں کہ یہ آسانیاں مشکل نہیں
اپنا رستہ اپنی دھن اپنا تصور اپنا شوق
کوئی بھی رہبرو یہاں بیگانۂ منزل نہیں
ہے تصور عشرت ماضی کا آئینہ بدست
دل وہی دل ہے مگر وہ گرمئ محفل نہیں
دیر کیا ہے آ مرے دل میں سما جا برق ناز
شکوہ سنجی فطرت احسان میں داخل نہیں
التماس شوق پر احسانؔ محشر ڈھ گیا
ان کا شرما کر یہ کہنا میں ترے قابل نہیں
Zindagi mein us ko kaif-e-zindagi hasil nahin
Zindagi mein us ko kaif-e-zindagi hasil nahin
Jis ka dil raaz o niyaz-e-ishq ke qabil nahin
Husn ke parde mein ho sakta nahin hargiz qarar
Roz-e-awwal se ye Laila khugar-e-mahmal nahin
Qadr kar dil ki ke dargah-e-khuda mein ae Nadeem
Do jahan ki ne'matein hazir hain lekin dil nahin
Hoshiyar ae mast o madhosh jawani hoshiyar
Ishq woh darya hai jo minnat-kash-e-sahil nahin
Zabt-e-nala zabt-e-girya zabt-e-ulfat zabt-e-shauq
Kis tarah keh doon ke ye aasaniyan mushkil nahin
Apna rasta apni dhun apna tasawwur apna shauq
Koi bhi rahrav yahan begana-e-manzil nahin
Hai tasawwur-e-ishrat-e-maazi ka aaina badast
Dil wohi dil hai magar woh garmi-e-mahfil nahin
Der kya hai aa mere dil mein sama ja barq-e-naaz
Shikwa sanji fitrat-e-Ehsan mein dakhil nahin
Iltimas-e-shauq par Ehsan! mahshar dhe gaya
Un ka sharma kar ye kehna main tere qabil nahin
شاعر کے بارے میں
احسانؔ دانش اردو کے اُن ممتاز اور منفرد شاعروں میں شمار ہوتے ہیں جن کی زندگی خود جدوجہد، محنت اور خودداری کی عملی تصویر تھی۔ ان کا اصل نام احسان ال...
مکمل تعارف پڑھیں