روپوش ہونے کا دن — اقتدار جاوید

Rooposh Hone Ka Din

Ufaq wale tehkhane se
Woh bar aamad hua din
Jo qarnon pe bhaari hai
Aankhon ke aage
Andhere ka malba girata hai
Chautaraf ghera banata hai
Haibat badhata hai
Mukhbir
Bade aatishi sheeshe se
Raaston ka ghana jaal takta hai
Bahar
Taghare ke neeche qadam ke nishan ko chhupaya hua hai
Lahad ki zara si jagah ko
Falak zar gumbad banaya hua hai
Gharon ki chhaten udne bijli kadakne
Maa'an qurs-e-khursheed chhipne
Safedi bhare aasmani kinare ke tareek hone ka din aa gaya hai
Shararat se sarshaar
Behnon ke khamosh hone ka
Aur maa'n ke khamosh hone ka din aa gaya hai
Meri maa'n
Meri an-kahi batein aise samajhti thi
Dawood jaise parindon ki batein samajhta tha
Maa'n ki muhabbat bhari god aate ka peda thi
Jab main hamakta
To maa'n ki muhabbat bhari god aise pighalti thi
Dawood ke haath mein jaise loha pighalta tha
Main toot'ta to
Hararat bhari god mein
Aise judta tha
Sarah ke khawand ki awaz par
Jis tarah murgh judta tha
Aur dil tashakkur se bharta tha
Sarah ke khawand ka dil
In pahadon ke peechhe
Kahin par Safa aur Marwah nahin thi
Jahan maa'n meri daud sakti
Phate nakhunon aur ra'asha zada jism se
Woh muhabbat bhare garam pani chamakte hue aansuon jaise pani ki khwahish mein
Kaise kunwan khod sakti
Jahan par na pani ki roshan jabeen thi
Na pani tha
Maine kaha tha ke maa'n
Mere lohe ki soorat pighalne mere murgh ki tarah
Tukdon mein taqseem hone ka din aa gaya hai
Zamanon talak
Tere rone ka
Behnon ke khamosh hone ka
Aur mere rooposh hone ka din aa gaya hai