موج گل موج صبا موج سحر لگتی ہے — جان نثار اختر
شاعر
موج گل موج صبا موج سحر لگتی ہے
موج گل موج صبا موج سحر لگتی ہے
سر سے پا تک وہ سماں ہے کہ نظر لگتی ہے
ہم نے ہر گام پہ سجدوں کے جلائے ہیں چراغ
اب ہمیں تیری گلی راہ گزر لگتی ہے
لمحے لمحے میں بسی ہے تری یادوں کی مہک
آج کی رات تو خوشبو کا سفر لگتی ہے
جل گیا اپنا نشیمن تو کوئی بات نہیں
دیکھنا یہ ہے کہ اب آگ کدھر لگتی ہے
ساری دنیا میں غریبوں کا لہو بہتا ہے
ہر زمیں مجھ کو مرے خون سے تر لگتی ہے
کوئی آسودہ نہیں اہل سیاست کے سوا
یہ صدی دشمن ارباب ہنر لگتی ہے
واقعہ شہر میں کل تو کوئی ایسا نہ ہوا
یہ تو اخبار کے دفتر کی خبر لگتی ہے
لکھنؤ کیا تری گلیوں کا مقدر تھا یہی
ہر گلی آج تری خاک بسر لگتی ہے
Mauj-e-gul mauj-e-saba mauj-e-sahar lagti hai
Mauj-e-gul mauj-e-saba mauj-e-sahar lagti hai
Sar se paa tak woh samaaN hai ke nazar lagti hai
Hum ne har gaam pe sajdon ke jalaye hain charaagh
Ab humein teri gali raah-guzar lagti hai
Lamhe lamhe mein basi hai teri yaadon ki mehak
Aaj ki raat to khushboo ka safar lagti hai
Jal gaya apna nasheman to koi baat nahin
Dekhna yeh hai ke ab aag kidhar lagti hai
Saari duniya mein ghareeboN ka lahoo behta hai
Har zameen mujh ko mere khoon se tar lagti hai
Koi aasooda nahin ahl-e-siyasat ke siva
Yeh sadi dushman-e-arbab-e-hunar lagti hai
Waqia shehr mein kal to koi aisa na hua
Yeh to akhbaar ke daftar ki khabar lagti hai
Lucknow kya teri galioN ka muqaddar thha yehi
Har gali aaj teri khaak basar lagti hai
شاعر کے بارے میں
جان نثار اختر اردو کے ممتاز شاعر اور فلمی نغمہ نگار تھے، جن کا تعلق ترقی پسند ادبی تحریک سے تھا۔ وہ ۱۸ فروری ۱۹۱۴ کو گوالیار (مدھیہ پردیش، بھارت) م...
مکمل تعارف پڑھیں