کیا تعجب کہ مری روح رواں تک پہنچے — جگر مراد آبادی
شاعر
کیا تعجب کہ مری روح رواں تک پہنچے
کیا تعجب کہ مری روح رواں تک پہنچے
پہلے کوئی مرے نغموں کی زباں تک پہنچے
جب ہر اک شورش غم ضبط فغاں تک پہنچے
پھر خدا جانے یہ ہنگامہ کہاں تک پہنچے
آنکھ تک دل سے نہ آئے نہ زباں تک پہنچے
بات جس کی ہے اسی آفت جاں تک پہنچے
تو جہاں پر تھا بہت پہلے وہیں آج بھی ہے
دیکھ رندان خوش انفاس کہاں تک پہنچے
جو زمانے کو برا کہتے ہیں خود ہیں وہ برے
کاش یہ بات ترے گوش گراں تک پہنچے
بڑھ کے رندوں نے قدم حضرت واعظ کے لیے
گرتے پڑتے جو در پیر مغاں تک پہنچے
تو مرے حال پریشاں پہ بہت طنز نہ کر
اپنے گیسو بھی ذرا دیکھ کہاں تک پہنچے
ان کا جو فرض ہے وہ اہل سیاست جانیں
میرا پیغام محبت ہے جہاں تک پہنچے
عشق کی چوٹ دکھانے میں کہیں آتی ہے
کچھ اشارے تھے کہ جو لفظ و بیاں تک پہنچے
جلوے بیتاب تھے جو پردۂ فطرت میں جگرؔ
خود تڑپ کر مری چشم نگراں تک پہنچے
Kyā ta'ajjub ki mirī rūh-e-ravāñ tak pahuñche
Kyā ta'ajjub ki mirī rūh-e-ravāñ tak pahuñche
Pahle koī mere naġhmoñ kī zabāñ tak pahuñche
Jab har ik shorish-e-ġham zabt-e-fuġhāñ tak pahuñche
Phir ḳhudā jaane ye hañgāma kahāñ tak pahuñche
Āñkh tak dil se na aa.e na zabāñ tak pahuñche
Baat jis kī hai usī āfat-e-jāñ tak pahuñche
Tū jahāñ par thā bahut pahle vahīñ aaj bhī hai
Dekh rindāñ-e-ḳhush-anfās kahāñ tak pahuñche
Jo zamāne ko burā kahte haiñ ḳhud haiñ vo bure
Kāsh ye baat tire gosh-e-girāñ tak pahuñche
BaḌh ke rindoñ ne qadam hazrat-e-vā'iz ke liye
Girte paḌte jo dar-e-pīr-e-muġhāñ tak pahuñche
Tū mere hāl-e-pareshāñ pe bahut tanz na kar
Apne gesū bhī zarā dekh kahāñ tak pahuñche
Un kā jo farz hai vo ahl-e-siyāsat jāneñ
Merā paiġhām-e-mohabbat hai jahāñ tak pahuñche
Ishq kī choT dikhāne meñ kahīñ aatī hai
Kuchh ishāre the ki jo lafz o bayāñ tak pahuñche
Jalve betāb the jo parda-e-fitrat meñ jigar
Khud taḌap kar mirī chashm-e-nigrāñ tak pahuñche
شاعر کے بارے میں
جگر مرادآبادی اردو کے ممتاز کلاسیکی غزل نگار اور صوفی شاعر تھے، جن کا اصل نام علی سکندر تھا اور تخلص جگر مرادآبادی تھا۔ ان کی پیدائش چھ اپریل انیس ...
مکمل تعارف پڑھیں