وہ ادائے دلبری ہو کہ نوائے عاشقانہ — جگر مراد آبادی
شاعر
وہ ادائے دلبری ہو کہ نوائے عاشقانہ
وہ ادائے دلبری ہو کہ نوائے عاشقانہ
جو دلوں کو فتح کر لے وہی فاتح زمانہ
یہ ترا جمال کامل یہ شباب کا زمانہ
دل دشمناں سلامت دل دوستاں نشانہ
کبھی حسن کی طبیعت نہ بدل سکا زمانہ
وہی ناز بے نیازی وہی شان خسروانہ
میں ہوں اس مقام پر اب کہ فراق و وصل کیسے
مرا عشق بھی کہانی ترا حسن بھی فسانہ
مری زندگی تو گزری ترے ہجر کے سہارے
مری موت کو بھی پیارے کوئی چاہیئے بہانہ
ترے عشق کی کرامت یہ اگر نہیں تو کیا ہے
کبھی بے ادب نہ گزرا مرے پاس سے زمانہ
تری دوری و حضوری کا یہ ہے عجیب عالم
ابھی زندگی حقیقت ابھی زندگی فسانہ
مرے ہم صفیر بلبل مرا تیرا ساتھ ہی کیا
میں ضمیر دشت و دریا تو اسیر آشیانہ
میں وہ صاف ہی نہ کہہ دوں جو ہے فرق مجھ میں تجھ میں
ترا درد درد تنہا مرا غم غم زمانہ
ترے دل کے ٹوٹنے پر ہے کسی کو ناز کیا کیا
تجھے اے جگرؔ مبارک یہ شکست فاتحانہ
Woh ada-e-dilbari ho ke nawa-e-ashiqana
Jo dilon ko fateh kar le wahi fateh-e-zamana
Yeh tera jamal-e-kamil yeh shabab ka zamana
Dil-e-dushmanan salamat dil-e-dostan nishana
Kabhi husn ki tabiyat na badal saka zamana
Wahi naaz-e-be-niyazi wahi shaan-e-khusrawana
Main hun is muqam par ab ke firaq-o-vasl kaise
Mera ishq bhi kahani tera husn bhi fasana
Meri zindagi to guzri tere hijr ke sahaare
Meri maut ko bhi pyare koi chahiye bahana
Tere ishq ki karamat yeh agar nahin to kya hai
Kabhi be-adab na guzra mere paas se zamana
Teri doori-o-hazuri ka yeh hai ajib alam
Abhi zindagi haqeeqat abhi zindagi fasana
Mere ham-safeer bulbul mera tera saath hi kya
Main zameer-e-dasht-o-darya tu aseer-e-ashiyana
Main woh saaf hi na keh dun jo hai farq mujh mein tujh mein
Tera dard dard-e-tanha mera gham gham-e-zamana
Tere dil ke tootne par hai kisi ko naaz kya kya
Tujhe aye Jigar! mubarak yeh shikast-e-fatehana
شاعر کے بارے میں
جگر مرادآبادی اردو کے ممتاز کلاسیکی غزل نگار اور صوفی شاعر تھے، جن کا اصل نام علی سکندر تھا اور تخلص جگر مرادآبادی تھا۔ ان کی پیدائش چھ اپریل انیس ...
مکمل تعارف پڑھیں