یہ جو رنگین تبسم کی ادا ہے مجھ میں — مسعودہ حیات
شاعر
یہ جو رنگین تبسم کی ادا ہے مجھ میں
یہ جو رنگین تبسم کی ادا ہے مجھ میں
مجھ کو لگتا ہے کوئی میرے سوا ہے مجھ میں
خود بھی حیراں ہوں ازل سے کہ یہ کیا ہے مجھ میں
کون شہ رگ سے مری بول رہا ہے مجھ میں
عمر بھر جس کو ترے غم کی امانت سمجھا
اب وہی تار نفس ٹوٹ گیا ہے مجھ میں
ایک خوشبو سی ابھرتی ہے نفس سے میرے
ہو نہ ہو آج کوئی آن بسا ہے مجھ میں
میرے قدموں پہ زمانے کی جبیں جھک جائے
دیوتاؤں کی طرح ایک انا ہے مجھ میں
تم تو کن کہہ کے نگاہوں سے چھپے ہو لیکن
ہر گھڑی ایک نیا حشر بپا ہے مجھ میں
کون تھا جو مرے احساس کو روشن کرتا
عمر بھر صرف مرا دل ہی جلا ہے مجھ میں
دل کبھی ظلمت فردا سے ہراساں نہ ہوا
ایک خورشید نیا روز اگا ہے مجھ میں
تلخ کامی سے تو کچھ اور نکھرتی ہے حیاتؔ
کس لیے زہر کوئی گھول رہا ہے مجھ میں
مسعودہ حیات
Ye jo rangeen tabassum ki ada hai mujh mein
Ye jo rangeen tabassum ki ada hai mujh mein
Mujh ko lagta hai koi mere siwa hai mujh mein
Khud bhi hairaan hoon azal se ke ye kya hai mujh mein
Kaun shah-rag se meri bol raha hai mujh mein
Umar bhar jis ko tere gham ki amanat samjha
Ab wahi taar-e-nafas toot gaya hai mujh mein
Ek khushboo si ubharti hai nafas se mere
Ho na ho aaj koi aan basa hai mujh mein
Mere qadmon pe zamane ki jabeen jhuk jaaye
Devtaon ki tarah ek ana hai mujh mein
Tum to kun keh ke nigahon se chhipe ho lekin
Har ghaRi ek naya hashr bapa hai mujh mein
Kaun tha jo mere ehsaas ko roshan karta
Umar bhar sirf mera dil hi jala hai mujh mein
Dil kabhi zulmat-e-farda se hiraasan na hua
Ek khursheed naya roz uga hai mujh mein
Talkh-kaami se to kuch aur nikhaRti hai Hayaat!
Kis liye zeher koi ghol raha hai mujh mein
شاعر کے بارے میں
ِمسعودہ حیات اردو کی معروف شاعرہ ہیں جنہوں نے اپنی تخلیقی صلاحیتوں اور حساس طرزِ اظہار کے ذریعے اردو ادب میں نمایاں مقام حاصل کیا۔ 1935ء میں دہلی میں پیدا ہونے والی مسعودہ حیات نے تدریس کے شعبے سے وابستہ رہتے ہوئے ادب کی خدمت کو بھی اپنی زندگی کا اہم مقصد بنایا۔ ان کی شخصیت میں ایک معلم کی سنجیدگی اور ایک شاعرہ کی لطافت یکجا نظر آتی ہے، جس کا عک...
مکمل تعارف پڑھیں