جب کبھی ان کی توجہ میں کمی پائی گئی — ساحر لدھیانوی
شاعر
جب کبھی ان کی توجہ میں کمی پائی گئی
جب کبھی ان کی توجہ میں کمی پائی گئی
از سر نو داستان شوق دہرائی گئی
بک گئے جب تیرے لب پھر تجھ کو کیا شکوہ اگر
زندگانی بادہ و ساغر سے بہلائی گئی
اے غم دنیا تجھے کیا علم تیرے واسطے
کن بہانوں سے طبیعت راہ پر لائی گئی
ہم کریں ترک وفا اچھا چلو یوں ہی سہی
اور اگر ترک وفا سے بھی نہ رسوائی گئی
کیسے کیسے چشم و عارض گرد غم سے بجھ گئے
کیسے کیسے پیکروں کی شان زیبائی گئی
دل کی دھڑکن میں توازن آ چلا ہے خیر ہو
میری نظریں بجھ گئیں یا تیری رعنائی گئی
ان کا غم ان کا تصور ان کے شکوے اب کہاں
اب تو یہ باتیں بھی اے دل ہو گئیں آئی گئی
جرأت انساں پہ گو تادیب کے پہرے رہے
فطرت انساں کو کب زنجیر پہنائی گئی
عرصۂ ہستی میں اب تیشہ زنوں کا دور ہے
رسم چنگیزی اٹھی توقیر دارائی گئی
Jab kabhī un kī tavajjoh mein kamī pāī gaī
Jab kabhī un kī tavajjoh mein kamī pāī gaī
Az-sar-e-nau dāstān-e-shauq dohrāī gaī
Bik ga'e jab tere lab phir tujh ko kyā shikwa agar
Zindagānī bādah o sāghar se behlāī gaī
Ai gham-e-dunyā tujhe kyā ilm tere wāste
Kin bahānoñ se tabī'at rāh par lāī gaī
Ham kareñ tark-e-wafā achchhā chalo yūñ hī sahī
Aur agar tark-e-wafā se bhī na ruswāī gaī
Kaise kaise chashm-o-'āriz gard-e-gham se bujh ga'e
Kaise kaise paikaroñ kī shān-e-zebāī gaī
Dil kī dhaṛkan mein tawāzun ā chalā hai khair ho
Merī nazreñ bujh ga'īñ yā terī ra'anāī gaī
Un kā gham un kā tasavvur un ke shikwe ab kahāñ
Ab to ye bāteñ bhī ai dil ho ga'īñ āī ga'ī
Jur'at-e-insān pe go ta'dīb ke pahre rahe
Fitrat-e-insān ko kab zanjīr pahnāī gaī
Arsah-e-hastī mein ab tesha-zanoñ kā daur hai
Rasm-e-changīzī uṭhī tauqīr-e-dārāī gaī
شاعر کے بارے میں
اردو ادب اور بھارتی فلم نگری کا وہ شاعر جس نے لفظوں کو صرف جذبات نہیں، شعور بھی دیا ساحر لدھیانوی جن کا اصل نام عبدالحئی تھا، 8 مارچ 1921 کو لدھیان...
مکمل تعارف پڑھیں