اب کیا بتاؤں میں ترے ملنے سے کیا ملا — سیماب اکبر آبادی
شاعر
اب کیا بتاؤں میں ترے ملنے سے کیا ملا
اب کیا بتاؤں میں ترے ملنے سے کیا ملا
عرفان غم ہوا مجھے اپنا پتا ملا
جب دور تک نہ کوئی فقیر آشنا ملا
تیرا نیاز مند ترے در سے جا ملا
منزل ملی مراد ملی مدعا ملا
سب کچھ مجھے ملا جو ترا نقش پا ملا
خود بین و خود شناس ملا خود نما ملا
انساں کے بھیس میں مجھے اکثر خدا ملا
سرگشتۂ جمال کی حیرانیاں نہ پوچھ
ہر ذرے کے حجاب میں اک آئنہ ملا
پایا تجھے حدود تعین سے ماورا
منزل سے کچھ نکل کے ترا راستہ ملا
کیوں یہ خدا کے ڈھونڈنے والے ہیں نامراد
گزرا میں جب حدود خودی سے خدا ملا
یہ ایک ہی تو نعمت انساں نواز تھی
دل مجھ کو مل گیا تو خدائی کو کیا ملا
یا زخم دل کو چھیل کے سینے سے پھینک دے
یا اعتراف کر کہ نشان وفا ملا
سیمابؔ کو شگفتہ نہ دیکھا تمام عمر
کم بخت جب ملا ہمیں غم آشنا ملا
Ab kya bataaun main tere milne se kya mila
Ab kya bataaun main tere milne se kya mila
Irfaan-e-gham hua mujhe apna pata mila
Jab duur tak na koi faqir aashna mila
Tera niyaaz-mand tere dar se ja mila
Manzil mili muraad mili muddaa mila
Sab kuch mujhe mila jo tera naqsh-e-paa mila
Khud-been-o-khud-shanaas mila khud-numa mila
Insaan ke bhes mein mujhe aksar khuda mila
Sarguzasht-e-jamaal ki hairaaniyan na poochh
Har zarre ke hijaab mein ek aaina mila
Paaya tujhe hudood-e-ta'ayyun se maawara
Manzil se kuch nikal ke tera raasta mila
Kyun yeh khuda ke dhoondhne waale hain naamuraad
Guzra main jab hudood-e-khudi se khuda mila
Yeh ek hi to ne'mat insaan-nawaaz thi
Dil mujh ko mil gaya to khudaai ko kya mila
Ya zakhm-e-dil ko chheel ke seene se phenk de
Ya e'tiraaf kar ke nishaan-e-wafa mila
Seemab! ko shagufta na dekha tamam umr
Kam-bakht jab mila hamein gham aashna mila
شاعر کے بارے میں
سیماب اکبرآبادی اردو ادب کے اُن ہمہ جہت اور عہدساز شعرا میں شمار ہوتے ہیں جنہوں نے شاعری، تنقید، ترجمہ اور ادارت ہر میدان میں گراں قدر خدمات انجام ...
مکمل تعارف پڑھیں